सिङ्गो देश प्राकृतिक विपत्तिको मारमा परेका बेला खाना पकाउने एलपी ग्यासमा प्रतिसिलिन्डर १०५ रुपैयाँ मूल्यवृद्धि गरिएको घटनाप्रति राष्ट्रिय उपभोक्ता मञ्चले गम्भीर ध्यानाकर्षण भएको जनाएको छ। 

लामो बाटोबाट ढुवानी गर्नुपरेको बहाना अघि सार्दै उद्योगीहरूले गरेको यो मूल्यवृद्धिलाई मञ्चले अमानवीय र निन्दनीय भनेको हो।

मञ्चका अध्यक्ष प्रेमलाल महर्जनद्वारा जारी विज्ञप्तिमा विपद्को मौका छोपेर कालोबजारी गर्ने नियतले उपभोक्ताको ढाड भाँचिने गरी मूल्य बढाइएको उल्लेख छ। संकटको बेला मूल्य नियन्त्रण गरी उपभोक्तालाई राहत दिनुपर्ने दायित्व बोकेको सरकारी निकाय नेपाल आयल निगम स्वयम् उद्योगीहरूको नाफाखोर प्रवृत्तिमा मिलोमतो गरी रमिते बनेको मञ्चको आरोप छ।

एकातर्फ बाढीपीडित जनताका लागि सरकारले विश्वसामु सहयोग मागिरहेको र व्यवसायीहरूले समेत सहयोगको हात बढााइरहेका छन्। यस्तो अवस्थामा नेपाल आयल निगमकै मिलोमतोमा ग्यासको भाउ बढाउनु लज्जास्पद विषय भएको विज्ञप्तिमा उल्लेख छ।

मञ्चले ढुवानीको बहानामा ग्यासमा गरिएको रु. १०५ मूल्यवृद्धि तत्काल खारेज गर्न सरकारसँग जोडदार माग गरेको छ। राष्ट्रिय संकटको मौका छोपी लुट मच्चाउने उद्योगी तथा त्यसमा प्रत्यक्ष वा अप्रत्यक्ष रूपमा मिलोमतो गर्ने आयल निगमका पदाधिकारीमाथि उच्चस्तरीय छानबिन गरी कडा कानुनी कारबाही गर्नुपर्ने मञ्चको माग छ। 

विपद्का बेला ग्याससहित सम्पूर्ण उपभोग्य वस्तुको सहज आपूर्ति सुनिश्चित गर्न पनि मञ्चले सम्बद्ध नियमनकारी निकायको ध्यानाकर्षण गराएको छ।