काठमाडौं । नेकपा एमालेका अध्यक्ष केपी शर्मा ओलीले गणतन्त्र प्रणाली मजबुत बनाई गरिबी र पछौटेपन विरूद्धको लडाइँ जित्नुपर्ने बताएका छन् ।
सोमबार गणतन्त्र दिवसको सन्दर्भमा शुभकामना सन्देश जारी गर्दै उनले गणतन्त्रसभ्यता, संस्कृति र सामाजिक जीवन पद्धति रहेको बताए । अभ्यासबाट नै गणतन्त्रालाई  लोकप्रिय बनाउनुपर्ने उनको भनाई छ ।
शुभकामना सन्देशमा उनले भनेका छन्,‘गणतन्त्रलाई अभ्यासद्वारा नै लोकप्रिय बनाउनुपर्छ । जहाँ सीमान्तकृत, अल्पसंख्यक, गरिबी र बेथितिमा बाँचेका वर्गहरू, महिला, बालबालिका, पछाडि परेका र पारिएका समुदायको बीचमा विभेद र बहिष्करण होइन, राज्यको संरक्षणले स्थान पाउन सकोस् ।’
उनले गणतन्त्र दिवस जनताले ऐतिहासिक सफलता प्राप्त गरेको र जनता विजयी भएको महान उत्सव भएको बताँउदैं नेपालको राजनीतिक इतिहासको महत्वपूर्ण र अविस्मरणीय दिन रहेको बताए ।गणतन्त्र नेपाली जनताको बलिदान र संघर्ष  सफल भएको दिन भन्दै गणतन्त्र स्थापनापछि भएका त्रुटिलाई सच्याउनुपर्ने उनको भनाई छ ।