ओलीलाई ‘पेले’सँग तुलना गरेका कृष्णगोपालले भने– ‘त्यो भनाइको सान्दर्भिकता सकियो’
नेकपा (एमाले)का नेता कृष्णगोपाल श्रेष्ठले पार्टी अध्यक्ष केपी शर्मा ओलीलाई फुटबलका महान् खेलाडी पेलेसँग तुलना गर्दै विगतमा दिएको अभिव्यक्तिप्रति पश्चात्ताप जनाएका छन्।
सोमबार ललितपुरको भनिमण्डलमा बसेको एमाले केन्द्रीय कमिटी बैठकमा धारणा राख्दै श्रेष्ठले समय बदलिएकाले आफूले विगतमा दिएको उक्त अभिव्यक्तिको सान्दर्भिकता अहिले समाप्त भएको बताएका हुन्।
२०७८ सालमा शिक्षामन्त्री रहेका बेला श्रेष्ठले ओलीको पक्षमा बोल्दै उनलाई ‘फुटबलको पेले’सँग तुलना गरेका थिए। तर पछिल्लो समय ओलीको कार्यशैलीप्रति असन्तुष्टि जनाउँदै आएका श्रेष्ठले सोमबारको बैठकमै विधि र प्रक्रियाको विषय उठाएर ओलीसँग प्रतिवाद गरेका थिए।
बैठक सञ्चालनका क्रममा महासचिव शंकर पोखरेललाई भूमिका नदिएको भन्दै श्रेष्ठले आपत्ति जनाएका थिए। ओलीले उनलाई बस्न आग्रह गरेपछि श्रेष्ठले आफूलाई रोक्ने अधिकारबारे प्रश्न गर्दै पार्टी सञ्चालनको शैलीप्रति असन्तुष्टि जनाएका थिए।
श्रेष्ठले विगतमा ओलीको बचाउमा दिएको अभिव्यक्ति र अहिलेको धारणा फरक रहेको संकेत गर्दै समयअनुसार राजनीतिक परिस्थिति परिवर्तन भएको बताएका छन्।
