बेलायतकी दिवंगत राजकुमारी डायनाका भाइ चार्ल्स स्पेन्सरको नयाँ संस्मरण सार्वजनिक भएपछि बेलायती राजपरिवारसँग जोडिएका पुराना विवाद फेरि चर्चामा आएका छन्।

‘स्वान सङ : डायना, माई सिस्टर’ नामक संस्मरणमा स्पेन्सरले डायनाको निधनपछिका घटनासँगै राजा चार्ल्स तृतीयसँग सम्बन्धित विभिन्न दाबी गरेका छन्। उनले डायनाको पक्षबाट बोल्न र समयक्रममा स्थापित भएका केही गलत धारणालाई सच्याउन पुस्तक लेखेको बताएका छन्।

स्पेन्सरका अनुसार डायनाको निधनपछि चार्ल्सले फोनमा आफूहरूले उनलाई चाँडै बिर्सने बताएका थिए। साथै, डायनाका छोराहरू विलियम र ह्यारीलाई अन्त्येष्टिका क्रममा कफिनको पछाडि हिँडाउनुपर्ने विषयमा पनि चार्ल्स असन्तुष्ट रहेको उनको दाबी छ।

यसप्रति बकिङ्घम दरबारले लामो समयअघि भएको पारिवारिक शोकले मानिसको स्मरण र घटनाको मूल्याङ्कनमा प्रभाव पार्न सक्ने प्रतिक्रिया दिएको छ। स्पेन्सरले भने दरबारको प्रतिक्रियाले आफ्ना व्यक्तिगत स्मृतिमाथि प्रश्न उठाएको भन्दै आलोचना गरेका छन्।

सन् १९९७ मा पेरिसमा भएको कार दुर्घटनामा ३६ वर्षको उमेरमा डायनाको निधन भएको थियो। सन् १९८१ मा चार्ल्ससँग विवाह गरेकी डायनाको सम्बन्ध सन् १९९६ मा टुंगिएको थियो। उनको निधनपछि चार्ल्सले क्यामिला पार्कर बाउल्ससँग विवाह गरेका थिए।

संस्मरणमा डायनाले कठिन समय भोगेको र केही समय आत्महत्याको विचारसमेत आएको भए पनि छोराहरूप्रतिको प्रेमले उनलाई त्यस्तो कदमबाट रोकेको स्पेन्सरको दाबी छ। उनका केही दाबीमाथि शाही जीवनीकार तथा टिप्पणीकारहरूले भने प्रश्न उठाएका छन्।