ढाका — बङ्गलादेश प्रिमियर लिग (बीपीएल)को उद्घाटन खेलमा नेपाली लेग स्पिनर सन्दीप लामिछाने आवद्ध राजशाही वारियर्सले शानदार विजयी सुरुवात गरेको छ।

शुक्रबार सम्पन्न खेलमा राजशाहीले सिलेट टाइटन्सलाई आठ विकेटले पराजित गरेको हो। टस हारेर पहिले ब्याटिङ गरेको सिलेटले निर्धारित २० ओभरमा पाँच विकेटको क्षतिमा १९१ रनको चुनौतीपूर्ण लक्ष्य प्रस्तुत गरेको थियो।

उक्त लक्ष्य पछ्याएको राजशाहीले १९ ओभर चार बलमै १९२ रन बनाउँदै आठ विकेटको सहज जित निकालेको हो।

राजशाहीको जितमा नजमुल हुसेन शान्तो नायक बने। उनले ६० बलमा १० चौका र पाँच छक्का प्रहार गर्दै नटआउट १०१ रनको शतकीय इनिङ खेले। उनलाई मुशफिकुर रहिमले उत्कृष्ट साथ दिए। रहिमले चार चौका र दुई छक्काको मद्दतमा ५१ रन जोडे।

बलिङतर्फ नेपाली लेग स्पिनर सन्दीप लामिछानेले प्रभावशाली प्रदर्शन गरे। उनले चार ओभर बलिङ गर्दै ३८ रन खर्चेर दुई विकेट लिए। ब्याटिङमैत्री पिचमा दुवै इनिङमा दुई–दुई विकेट लिन सफल एकमात्र खेलाडी सन्दीप नै रहे।

उक्त खेलमा बंगलादेशका स्टार बलरहरू समेत विकेटका लागि संघर्षरत देखिए। राजशाहीको सन्तुलित प्रदर्शनले टोलीले प्रतियोगितामा बलियो सुरुवात गरेको छ।