सधैँ टेलिभिजनको पर्दामा देखिरहेका आफ्ना आदर्श खेलाडीहरूसँगै नेपाली खेलाडीले यस पटक एसिया कप खेले । नेपालको एसिया कप सहभागिता केवल औपचारिकतामा सीमित रहेन, प्रतियोगितामा नेपाली खेलाडीले उत्कृष्ट प्रदर्शन पनि गरे । 

नेपाली खेलाडीले  उत्कृष्ट प्रदर्शन गर्दा पहिलो पटक एसिया कप खेलिरहेको भान हुन दिएनन् । खासगरी भारतविरुद्धको खेलमा त नेपाली खेलाडीको प्रदर्शन अब्बल रह्यो । विश्व क्रिकेटमा स्थापित भारतीय खेलाडीहरू समेत नेपाली खेलाडीको प्रदर्शनबाट प्रभावित बने ।

खेलका क्रममा नेपाली खेलाडीले आफूले आदर्श मान्दै आएका भारतीय खेलाडीहरू भलाकुसारी पनि गरे । उनीहरुले विराट कोहली, रोहित शर्माजस्ता प्रभावशाली भारतीय खेलाडीको अटोग्राफ पनि लिन भ्याए । 

यसैक्रममा नेपाली टोलीका अलराउन्डर सोमपाल कामीले पनि भारतीय टोलीका प्रभावशाली खेलाडी विराट कोहलीको अटोग्राफ लिएका छन् । उनले आफ्नो जुत्तामा विराट कोहलीको अटोग्राफ लिएका हुन् ।

यसैबीच, नेपाली क्रिकेट टोलीको प्रदर्शनलाई लिएर इन्डियन प्रिमियर लिग (आईपीएल) खेल्ने टोलीहरुले पनि सकारात्मक प्रतिक्रिया दिएका छन् । उनीहरुले नेपालले एसिया कपमा उत्कृष्ट प्रदर्शन गरेको भन्दै प्रशंसासमेत गरेका छन् । 

खासमा खेलपछि नेपाली टोलीका प्रशिक्षक मोन्टी देसाईले खेलपछि आफ्ना खेलाडीलाई भारतीय टोलीको ड्रेसिङ रुपमा लिएर गएका थिए । नेपाली टोलीका प्रमुख प्रशिक्षक देसाई भारतीय नागरिक हुन् । 

उनी आफ्ना खेलाडीलाई भारतीय खेलाडीसँग भेटाएर अनुभव आदान—प्रदान गराउन चाहन्थे । सो अवसरमा दुबै टोलीका खेलाडीले खेलको विषयमा कुराकानी पनि गरेका थिए । त्यतिबेला नै नेपाली खेलाडीहरूले भारतीय खेलाडीहरूको अटोग्राफ पनि लिएका हुन् ।

त्यतिबेला भारतीय टोलीका खेलाडीहरूले नेपाली खेलाडीलाई मेडल पनि लगाइदिएका थिए । भारतीय टोलीका प्रमुख प्रशिक्षक राहुल द्रविडले पनि नेपालीको खेलाडीको प्रदर्शन उत्कृष्ट रहेको बताउँदै खेलाडीलाई मेडल लगाइदिएका थिए । 

द्रविड भारतीय टोलीका पूर्व कप्तान पनि हुन् । उनी भारतीय टोलीका सफल कप्तानमध्ये एक मानिन्छन् । नेपाल क्रिकेट सङ्घ (क्यान) ले पनि भारतीय खेलाडी र प्रशिक्षकले नेपाली खेलाडीलाई मेडल लगाइदिएको भिडियो सेयर गरेको छ । 

आईपीएल क्लब चेन्नई सुपर किङ्सले सामाजिक सञ्जाल फेसबुकमा नेपाली टोलीको तस्बिर सेयर गर्दै लेखेको छ, ‘हिमालयनदेखि एसिया कपसम्मको यात्रा । यो हो नेपालको विश्व क्रिकेटको गौरवमय यात्रा ।’