काठमाडौं । प्रधानमन्त्री पुष्पकमल दाहाल प्रचण्डले लोकतन्त्र र संविधानको रक्षा एवं न्याय प्रणालीमा सुधारका लागि नेपाल बार एशोसिएसनले खेलेको भूमिकाप्रशंसायोग्य रहेको बताएका छन् ।

प्रधानन्यायाधीश नियुक्तिबारे ध्यानाकर्षण गराउन बिहीबार विहान प्रधानमन्त्रीको सरकारी निवास बालुवाटार पुगेका बारका पदाधिकारीसंगको भेटमा प्रधानमन्त्री प्रचण्डले प्रधानन्यायाधीश नियुक्तिको बारेमा आफुले पहल जारी राखेको बताए । 

भेटमा बारका पदाधिकारीहरूले १४ महिनादेखि सर्वोच्च अदालतकायममुकायम प्रधानन्यायाधीशको भरमा चलिरहेको भन्दै तत्काल संवैधानिक परिषदको बैठक राखीप्रधानन्यायाधीशको छिनाफानो गर्न आग्रह गरेका थिए । 
 
प्रधानमन्त्री प्रचण्डसंगको सञ्चारकर्मीहरुसँग कुरा गर्दै नेपाल बारका अध्यक्ष गोपालकृष्ण घिमिरेले आफुहरुले प्रधानन्यायाधीश नियुक्तिमा भएको ढिलाईले पारेको प्रभावको बारेमा जानकारी गराउँदै चाँडै प्रधानन्यायधीश नियुक्ति गर्न  ध्यानकर्षण गरेको बताए । 

उनले भने ‘ प्रधानमन्त्री संवैधानिक परिषदको अध्यक्षसमेत भएकाले तत्काल प्रधानन्यायाधीश नियुक्तिको पहल लिन ध्यानाकर्षण गराएका छौं, प्रधानमन्त्री प्रचण्डले प्रधानन्यायाधीश नियुक्तिका लागि आफूले पहल गरिरहेको र चाँडै ठोस निस्कर्षमा पुग्ने बताउनु भएको छ । ’ 

यस अघि हिजो बुधबार पत्रकार सम्मेलन गर्दै नेपाल बारले ७ देखि १० दिनभित्र प्रधानन्यायाधीश नियुक्त नभए आन्दोलन गर्ने घोषणा गरेको थियो ।