युरोपियन फुटबलको दोस्रो श्रेणीको क्लब प्रतियोगिता युरोपा लिग अन्तर्गत अन्तिम ३२ को पहिलो लेगको खेलमा इंग्लिस क्लब आर्सनलले जित हात पार्दा त्यहाँकै अर्को क्लब म्यानचेष्टर युनाइटेड भने बराबरीमै रोकिएको छ ।

बिहीबार राति भएको खेलमा आर्सनलले ग्रीक क्लब ओलम्पियाकोसलाई १-० ले पराजित गरेको हो । ग्रीसमा भएको खेलमा आर्सनलका लागि ८१ औं मिनेटमा एलेक्जान्डर लाकाजेटले एक मात्र गोल गरे ।

यस्तै युनाइटेड भने बेल्जियन क्लब ब्रुगसंग १-१ को बराबरीमा रोकियो । खेलको १५ औं मिनेटमै उमानुएल डेभिसको गोलमा ब्रुगले घरेलु मैदानमा अग्रता लिएको थियो। तर ३६औं मिनेटमा युनाइटेडका लागि एन्टोनी मार्सिएलले बराबरी गोल पर्काए । दोस्रो हाफमा गोल नहुँदा खेल बराबरीमै सकियो ।

अर्को इंग्लिस क्लब वल्भ्सले भने स्पेनको स्पानयोलमाथि ४-० को शानदार जित हात पार्‍यो । स्पानयोल हारे पनि गेटाफेले भने गत सिजन च्याम्पियन लिगको सेमिफाइनल खेलेको अयाक्सलाई २-० ले हरायो । अर्को स्पानिस सेभियाले सिएफआर क्लुजसंग १-१ को बराबरी खेल्यो ।

यसैगरी इटालियन क्लब इन्टरले लुडोगोरेट्सलाई २-० र रोमाले जेन्टलाई १-० ले हरायो । जर्मनीका दुवै क्लबले जित हात पारे । इनट्राट फ्राङकफर्टले साल्जवर्गलाई ४-१ ले तथा वायरलेभरकुजनले पोरचुगलको एफसी पोर्टोलाई २-० ले हरायो ।

पोर्चुगलकै अर्को क्लब वेनफिका युक्रेनी क्लब साख्तर डोनेसकसंग २-१ ले पराजित हुँदा अर्को पोर्चुगिज क्लब स्पोर्टिङ सिएफले इस्तानबुल बासाकसिएरलाई ३-१ ले हरायो ।