सूचना तथा सञ्चारमन्त्री विक्रम तिमिल्सिना ले चलचित्र मनोरञ्जनको माध्यम मात्र नभई समाजको सामूहिक स्मृति, सांस्कृतिक पहिचान र राष्ट्रिय आत्माको अभिव्यक्ति भएको बताएका छन्।

राष्ट्रपति भवन शीतलनिवासमा आयोजित ‘राष्ट्रिय चलचित्र पुरस्कार तथा सम्मान समारोह, २०८३’ मा बोल्दै उनले कुनै राष्ट्रलाई बुझ्न इतिहास मात्र नभई त्यसका चलचित्र, संस्कृति र सामाजिक जीवनलाई पनि अध्ययन गर्न आवश्यक रहेको बताए। उनले कला र सिर्जनाले समाजमा सहअस्तित्व, मानवीय सम्बन्ध र संवेदनशीलता प्रवर्द्धन गर्ने धारणा व्यक्त गरे।

मन्त्री तिमिल्सिनाले चलचित्र क्षेत्रको अपेक्षाअनुसार समयसापेक्ष र व्यावहारिक चलचित्र ऐन ल्याउन सरकार प्रतिबद्ध रहेको पनि स्पष्ट पारे। चलचित्र क्षेत्रका समस्या र चुनौती समाधानका लागि सरकार चलचित्रकर्मीसँग निरन्तर संवादमा रहने उनले बताए।

यसैबीच, चलचित्र विकास बोर्डद्वारा प्रदान गरिने दीर्घ साधना सम्मानबाट मदनकृष्ण श्रेष्ठ सम्मानित भएका छन्। उत्कृष्ट चलचित्रको पुरस्कार ऊनको स्वीटर ले प्राप्त गरेको छ भने उत्कृष्ट निर्देशकमा नवीन चौहान, उत्कृष्ट अभिनेतामा नीर शाह र उत्कृष्ट अभिनेत्रीमा मिरुना मगर पुरस्कृत भएका छन्।