काठमाडौं, जेठ २५ — सोमबार बसेको मन्त्रिपरिषद् बैठकले विभिन्न चार महत्वपूर्ण निर्णय गरेको छ। सरकारका प्रवक्ता तथा शिक्षामन्त्री सस्मित पोखरेलले बैठकका निर्णय सार्वजनिक गरेका हुन्।

उनका अनुसार बैठकले सहसचिव मुकेश डंगोललाई नेपाल नागरिक उड्डयन प्राधिकरणको महानिर्देशकमा नियुक्त गर्ने निर्णय गरेको छ। साथै अर्थ तथा अन्य मन्त्रालयसँग सम्बन्धित विभिन्न विषयमा समेत निर्णय भएको उनले जानकारी दिए।

मन्त्रिपरिषद् बैठकका प्रमुख निर्णयहरू यसप्रकार छन्:

१. नेपाल–चीन जोड्ने विद्युत् प्रसारणलाइन आयोजना (चिलिमे–केरूङ) को कार्यान्वयनका लागि चीन सरकारलाई पठाउने प्रतिउत्तरपत्र (लेटर अफ रिप्लाई) स्वीकृत गर्ने।

२. आर्थिक वर्ष २०८३/८४ का लागि वर्षे धान बालीको न्यूनतम समर्थन मूल्य निर्धारण गर्ने। जसअनुसार मोटा धानको प्रतिक्विन्टल ३,६६० रुपैयाँ र मध्यम धानको प्रतिक्विन्टल ३,८६० रुपैयाँ तोकिएको छ।

३. सहकारीमा भएको बेथिति जाँचबुझ आयोग, २०८२ को प्रतिवेदन सार्वजनिक गर्ने निर्णय।

४. नेपाल नागरिक उड्डयन प्राधिकरणको महानिर्देशक पदमा सहसचिव मुकेश डंगोललाई नियुक्त गर्ने निर्णय।

सरकारले यी निर्णयलाई प्रशासनिक सुधार, कृषि समर्थन र पूर्वाधार विकाससँग जोडिएको बताएको छ।