काठमाडौं — नेपाल एस्ट्रोनोमिकल सोसाइटीले आयोजना गरेको १३औँ राष्ट्रिय खगोल विज्ञान ओलम्पियाड २०२६ दोस्रो चरणमा प्रवेश गरेको छ। प्रदेशस्तरीय पहिलो चरणको परीक्षाबाट उत्कृष्ट विद्यार्थी छनोट भएपछि प्रतियोगिता राष्ट्रिय चरणतर्फ अघि बढेको हो।

सोसाइटीका अनुसार प्रतियोगिताबाट उत्कृष्ट विद्यार्थी छनोट गरी अन्तर्राष्ट्रिय खगोल तथा खगोल भौतिक ओलम्पियाडका लागि नेपालको टोली तयार गरिनेछ। पहिलो चरणका परीक्षा सातै प्रदेशका मोरङ, धनुषा, काठमाडौं, कास्की, रूपन्देही, सुर्खेत र कैलालीमा सञ्चालन गरिएका थिए।

कोशी प्रदेश (सिनियर) तर्फ शिक्षादीप बोर्डिङ सेकेन्डरी स्कुलका सिद्धान्त पराजुली प्रथम भएका छन् भने जुनियर समूहमा बाल कल्याण विद्या मन्दिरका शहवाज आलम शीर्ष स्थानमा रहेका छन्। मधेस प्रदेशमा सिनियर समूहबाट ज्ञानदा एकेडेमीका गौरव गुप्ता पहिलो भएका छन्।

बागमती प्रदेशबाट सबैभन्दा बढी विद्यार्थी राष्ट्रिय चरणका लागि छनोट भएका छन्। यहाँ सिनियर समूहमा काठमाडौं मोडल स्कुल, ललितपुरका आर्यन खड्का तथा जुनियर समूहमा काठमाडौं प्रज्ञाकुञ्ज स्कुलका सम्पन्न दाहाल प्रथम भएका छन्।

त्यसैगरी गण्डकी प्रदेशमा सिनियरतर्फ मदरल्यान्ड सेकेन्डरी स्कुलका शश्वत रेग्मी, लुम्बिनी प्रदेशमा बिहान न्यौपाने, कर्णाली प्रदेशमा नमुना शाह तथा सुदूरपश्चिम प्रदेशमा प्रशुद पन्तले सिनियर समूहमा पहिलो स्थान हासिल गरेका छन्।

सोसाइटीले शिक्षा, विज्ञान तथा प्रविधि मन्त्रालयबाट राष्ट्रियस्तरको ओलम्पियाड सञ्चालनका लागि आधिकारिक मान्यता प्राप्त गरेको जनाएको छ।