काठमाडौं, ८ माघ – आईसीसी महिला टी-२० विश्वकप ग्लोबल छनोटमा नेपालले आफ्नो दोस्रो खेल जित्न १४१ रनको लक्ष्य पाएको छ।

टस हारेर पहिले ब्याटिङ गरेको नेदरल्यान्ड्सले २० ओभरमा ५ विकेट गुमाएर १४० रन बनाएको हो। नेदरल्यान्ड्सका लागि कप्तान बाबेट डे लिडले सर्वाधिक ४९ रन बनाइन् भने स्टेर कालिसले ३० रन थपिन्। रोबिन रिके १९ र आइरिस ज्विलिङ १४ रनमा अविजित रहिन्।

खेलको शुरुवातमा १५ रनमै २ विकेट गुमाएपछि बाबेट र कालिसले ७९ रनको महत्वपूर्ण साझेदारी गर्दै टिमलाई स्थिर बनाइन्।

नेपालका लागि रुबिना क्षेत्रीले २ विकेट लिए भने रिया शर्मा, सुमन विष्ट र पूजा महतोले १–१ विकेट हात पारिन्।

नेपाल यसअघि पहिलो खेलमा थाइल्यान्डसँग पराजित भएको थियो।