यू-१९ एसिया कप क्रिकेट प्रतियोगिता भारतीय महिला टोलीले जितेको छ। भारतले बंगलादेशलाई ४१ रनले हराउँदै उपाधि जितेको हो ।

मलेसियाको क्वालालाम्पुरमा भएको फाइनल भिडन्तमा बंगलादेशले टस जितेर पहिले बलिङ रोजेको थियो । भारतले पहिले ब्याटिङमा गएर निर्धारित २० ओभरमा ७ विकेट गुमाउँदै ११७ रन बनाएको थियो ।

भारतका लागि सबैभन्दा धेरै गोङ्गाडी त्रिशाले ५२ रन बनाइन् । उता बंगलादेशकोतर्फबाट फरजाना एसमीनले सबैभन्दा धेरै ४ विकेट झारिन् ।

११८ रनको लक्ष्य पछ्याउँदै जवाफी ब्याटिङमा उत्रिएको बंगलादेशको टोली १८.३ ओभरमा ७६ रन बनाएर अलआउट भयो । बंगलादेशका नौ ब्याटरले दोहोरो अंक बनाउन सकेनन् । सबैभन्दा धेरै २२ रन जौरिया फिरदौसले बनाइन् ।

उता भारतकोतर्फबाट आयुषी शुक्लाले तीन विकेट झारिन् । परुनिका सिसोदिया र सोनम यादवले २/२ विकेट लिए भने भीजे जोशिथाको नाममा एक विकेट रह्यो ।