काठमाडौं । आईसीसी टी-२० विश्वकप क्रिकेटमा अस्ट्रेलियाले लगातार दोस्रो जित निकाल्दै समूह ‘बी’को शीर्ष स्थानमा उक्लिएको छ।

शनिबार राति सम्पन्न भएको खेलमा विशाल रनको लक्ष्य दिएको अस्ट्रेलियाले इंग्ल्याण्डलाई ३६ रनले पराजित गरेको हो । शुरुमा ब्याटिङ गरेको अस्ट्रेलियाले दिएको २ सय २ रनको लक्ष्य पछ्याएको इंग्ल्याण्ड २० ओभरमा ६ विकेट गुमाउँदै १ सय ६५ रनमा समेटिएको छ।

अस्ट्रेलियाको जितका लागि एडम जाम्पा र प्याट कमिन्सले किफायती बलिङ गरेका हुन्। कमिन्सले ४ ओभरमा २३ रन खर्चेर २ विकेट लिंदा जम्पाले २८ रन खर्चेर समान २ विकेट हात पारेका छन्।

इंग्ल्याण्डका लागि कप्तान जोस बटलरले सर्वाधिक ४२ रन बनाएका हुन्। फिल साल्ट ३७, मोइन अली २५ रनमा आउट हुँदा ह्यारी ब्रुकले २० रन बनाएका छन्। अस्ट्रेलियाका लागि जोस हेजलवुड र मार्कस स्टोइनिसले एक एक विकेट हात पारेका हुन्। ब्याटिङ गरेको अस्ट्रेलियाले ७ विकेटको क्षतिमा २ सय १ रन बनाएको थियो। उसका लागि ओपनर ट्रेभिस हेड र डेभिड वार्नरले उत्कृष्ट शुरुवात गरेका छन्।

वार्नरले मात्र १६ बलमा २ चौका र ४ छक्का प्रहार गर्दै ३९ रन बनाएका हुन् । हेडले १८ बलमा ३ छक्का र २ चौकाको मद्दतमा ३४ रन जोडेका छन्। कप्तान मिचेल मार्सले २५ बलमा ३५ रन र मार्कस स्टोइनिसले ३० रन जोडेका हुन्। पहिलो खेलमा पहिलो बलमै आउट भएका ग्लेन म्याक्सवेलले दोस्रो खेलमा २८ रन जोड्दा म्याथ्यू वेडले १७ रन बनाएका थिए।

अस्ट्रेलियाको आक्रामक ब्याटिङलाई रोक्न इंग्ल्याण्डका लागि क्रिस जोर्डनले २ विकेट र मोइन अली, जोफ्रा आर्चर, आदिल रसिद र लियाम लिभिङ स्टोनले एकएक विकेट हात पारेका छन्। विश्वकपको यो समूहमा अस्ट्रेलिया, इंग्ल्याण्ड, स्कटल्याण्ड, नामिबिया र ओमान रहेका हुन्। अस्ट्रेलिया लगातार २ जित निकाल्दै ४ अंकसहित तालिकाको शीर्ष स्थानमा पुगेको छ।

२ खेलमा एक जित र एक खेलमा अंक बाँडेको स्कटल्याण्ड ३ अंकसहित तालिकाको दोस्रो स्थानमा रहेको हो । २ मा एक खेल गुमाएको नामिबिया २ अंकसहित तेस्रो स्थानमा रहेको छ। एउटा खेलमा अंक बाँडेर अर्को खेलमा पराजित भएको इंग्ल्याण्डले एक अंक जोडेको हो। ओमान अंक विहीन रहेको छ।