काठमाडौं । कान्तिपुर मिडिया ग्रुपका अध्यक्ष कैलाश सिरोहियाले आफूलाई बिनाकारण ९ दिन थुनामा राखिएको बताउदै कानूनी उपचार खोज्ने बताएका छन् ।

बुधबार साँझ हाजिरी जमानीमा रिहा भएपछि राति एक विज्ञप्ति जारी गर्दै सिरोहियाले सञ्चार माध्यमलाई तर्साउनले दुष्प्रयासले आफूलाई पक्राउ गरिएको बताएका हुन् । प्रहरी प्रशासनले आधारभूत अनुसन्धान पनि नगरी पक्राउ गरेको भन्दै सिरोहियाले आपत्ति जनाएका छन् ।

'सुशासन र लोकतन्त्रको पक्षमा तथा बेथितिका विरूद्ध विगत ३१ वर्षदेखि निर्भिक पत्रकारिता गर्दै आएको कान्तिपुर मिडिया ग्रुपका अध्यक्ष मलाई नागरिकता कसुरको आधारहीन आरोपमा पक्राउ गरी विगत ९ दिनदेखि थुनामा राखिएकोमा बुधबबार हाजिरी जमानीमा रिहा गरिएको छ। जिल्ला सरकारी वकिलको कार्यालय समेतको सहमतिमा जिल्ला प्रहरी कार्यालय धनुषाले मलाई फौजदारी कार्यविधि संहिताको दफा १५ ख (१) अनुसार ‘थप अनुसन्धानका लागि थुनामा राखिरहन नपर्ने’ भन्दै रिहा गरेको हो। मलाई जसरी पनि पक्राउ गर्ने, कान्तिपुरको पत्रकारितालाई दुर्बल बनाउने र अरू सञ्चार माध्यमलाई पनि तर्साउने दुष्प्रयासले यो हरकत भएको थियो भन्नेमा अब कुनै शंका रहेन उनले जारी गरिएको विज्ञप्तिमा भनिएको छ।’

जिल्ला प्रशासन कार्यालयले दिएको लिखित रायलाई समेत दबाएर आफूलाई पक्राउ गरिएको सिरोहियाले बताएका हुन् । जिल्ला प्रशासन कार्यालयको आफ्नै संयन्त्रभित्र अध्ययन गर्नुपर्नेमा सेवाग्राही नागरिकलाई पक्राउ गर्नु आफैंमा गैरजिम्मेवार हरकत भएको सिरोहियाले विज्ञप्तिमा उल्लेख गरेका छन् ।

‘बजारमा अनेकथरी हल्ला गरिए पनि मविरूद्ध मूलतः दुई आरोप लगाइएका थिए। अरू कोही व्यक्तिको नागरिकता र मेरो नागरिकताको नम्बर मिलेको विषयमा जिल्ला प्रशासन कार्यालयको आफ्नै संयन्त्रभित्र अध्ययन गर्नुपर्नेमा सेवाग्राही नागरिकलाई पक्राउ गर्नु आफैंमा गैरजिम्मेवार हरकत थियो भन्ने प्रस्ट छ। अझ, नागरिकतामा नम्बर मिलेको विषय प्रशासनिक त्रुटि भएकाले नागरिकमाथि कारबाही गर्न नपर्ने भनेर जिल्ला प्रशासन कार्यालयले दिएको लिखित रायलाई समेत दबाएर प्रहरीबाट मलाई पक्राउ गरिएको जारी  विज्ञप्तिमा उल्लेख गरिएको छ ।'