एजेन्सी । नेपालका लागि इजरायलका राजदूत हनान गोडेरले अतिवादी समूह हमासले बन्दी बनाएका विपिन जोशीसहित १ सय २५ जनाको निःशर्त रिहाइ गर्न माग गर्नुभएको छ ।

इजरायलको ७६औं स्वतन्त्रता दिवसका अवसरमा उपराष्ट्रपति रामसहायप्रसाद यादवको प्रमुख आतिथ्यमा बिहीबार आयोजित समारोहमा राजदूत गोडेरले उनीहरुको मुक्ति नै इजरायलको प्रमुख लक्ष्य भएको बताउनुभएको हो ।  उहाँले पश्चिम एशियामा शान्ति र सहिष्णुता कायम गर्न इजरायल निरन्तर लागिरहने प्रतिबद्धता व्यक्त गर्नुभयो ।

सन् १९६० मा इजरायल-नेपाल सम्बन्ध कूटनीतिक सम्बन्ध स्थापना हुनु तत्कालीन नेपाल सरकारको साहसिक कदमको सराहना गर्दै राजदूत गोडेरले भौगोलिक रूपमा इजरायल र नेपाल टाढा भए पनि सरकार एवं जनस्तरको सम्बन्ध प्रगाढ रहेको बताउनुभएको छ ।

सोही समारोहमा उपसभामुख, सांसद, विभिन्न राजनीतिक दलका नेता, पूर्वपरराष्ट्रमन्त्री, कूटनीतिक नियोगका प्रमुख तथा पदाधिकारी, नेपाल सरकारका उच्चपदस्थ कर्मचारी, उद्योगपति, व्यापारी र वरिष्ठ सञ्चारकर्मी लगायतका समाजका प्रतिष्ठित व्यक्तिहरूको उपस्थिति रहेको थियो ।

स्वतन्त्रता दिवसका उपलक्ष्यमा ८ महिना अघि अतिवादी समूह हमासले गरेको आक्रमणबाट इजरायलमा भएको क्षतिका तस्बिर प्रदर्शन गरिएका थिए । गत असोज २० गते हमासको आक्रमणमा १० जना नेपाली विद्यार्थीसहित १ हजार १ सय ३९ जनाको मृत्यु भएको थियो। आक्रमणका क्रममा सोही समूहले इजरायली एवं विदेशी गरी २ सय ५२ जनालाई बन्दी बनाएको हो । 

अस्थायी युद्धविरामका क्रममा हमासले २२ जना विदेशीसहित १ सय ५ जनालाई रिहा गरेको थियो ।