काठमाडौं । टी-२० सिरिजको दोस्रो खेलमा आइतबार नेपालले वेस्ट इन्डिज ‘ए’ को सामना गर्ने भएको छ ।

कीर्तिपुरस्थित त्रिवि अन्तर्राष्ट्रिय क्रिकेट मैदानमा शनिबार भएको पहिलो खेलमा ४ विकेटको शानदार जित निकालेको नेपाल आइतबार उच्च मनोबलका साथ मैदानमा उत्रने भएको हो । सोही खेल आइतबार दिउँसो १ बजेदेखि शुरु हुने भएको छ। वेस्ट इन्डिसँगको ५ खेलको टी-२० सिरिज अन्तर्गत आइतबार नेपालले दोस्रो खेल खेल्न लागेको हो।

टी-२० सिरिजको पहिलो खेलमा वेस्ट इन्डिज 'ए' विरुद्ध शनिबार नेपालले शानदार जित हाशिल गरेको छ । कीर्तिपुरस्थित त्रिवि अन्तर्राष्ट्रिय क्रिकेट मैदानमा शनिबार भएको खेलमा नेपालले वेस्ट इन्डिज 'ए' लाई ४ विकेटले पराजित गरेको हो ।

वेस्ट इन्डिजले दिएको २ सय ५ रनको लक्ष्य पछाएको नेपालले १९.३ ओभरमा ६ विकेट गुमाएर लक्ष्य पूरा गरेको छ । नेपालको जितमा कप्तान रोहित पौडेलले शानदार १ सय १२ रनको शतकीय पारी खेलेका थिए । उनले ५४ बलमा १० चौका र ६ छक्का प्रहार गरेका हुन् ।

यसअघि टस हारेर पहिला ब्याटिङ गरेको वेस्ट इन्डिज 'ए' ले २० ओभरमा ५ विकेट गुमाउँदै २ सय ४ रन बनाएको थियो । वेस्ट इन्डिजका लागि कप्तान रोस्टन चेजले सर्वाधिक ७४ रन बनाएका छन् । एलिक अथानाजेले भने ४७ रन बनाएका हुन् । त्यस्तै, किची कार्टीले ३८, आन्द्रे फ्लेचरले १३ र काडिम आलेयनेले १४ रन बनाएका थिए ।

त्यसैगरी नेपालका बलरकमल सिंह ऐरी, दिपेन्द्र सिंह ऐरी, रोहित पौडेल र अविनाश बोहोराले एक-एक विकेट लिएका छन् । सोही जितपछि नेपाल पाँचौं खेलको सिरिजमा १-० ले अगाडि भएको हो । नेपालको राष्ट्रिय टिमसँग प्रतिस्पर्धा गर्ने वेस्ट इन्डिज ‘ए’ टिममा अनुभवी खेलाडी समेटिएका छन्। वेस्ट इन्डिजले नेपालसँगको प्रतिस्पर्धाका लागि ३२ वर्षीय रोस्टन चेसको कप्तानीमा टिम नेपाल पठाएको छ ।

कीर्तिपुरमा नेपालले वेस्ट इन्डिजसँग ५ खेलको सिरिज अन्तर्गत तेस्रो खेल बुधबार, चौथो खेल बिहीबार र पाँचौं खेल शनिबार खेल्ने भएको हो । यस सिरिजलाई आगामी टी-२० विश्वकपको तयारीको रुपमा हेरिएको छ।