युरोपियन च्याम्पियन्स लिगअन्तर्गत स्पेनिस क्लब रियल म्याड्रिड पराजित भएको छ ।  मंगलबार राति भएको समूह 'बी' को खेलमा रियललाई युक्रेनको शख्तर डोनेट्क्सले २-० गोलले पराजित गरेको हो ।

पहिलो हाफ गोलरहित बराबरीमा सकिएको खेलमा शख्तरका लागि डेन्टिन्होले ५७ मिनेटमा पहिलो गोल गरेका थिए ।  ८२ मिनेटमा सोलोमोनले शख्तरको अग्रता दोब्बर पारेका थिए । 

अघिल्लो खेलमा रियलले इटालियन क्लब इन्टर मिलानलाई पराजित गरेको थियो। मंगलबार भने इन्टर मिलानले जित निकालेको छ ।  इन्टर मिलानले जर्मन क्लब बोरुसिया मुन्छेनग्लाडबाखमाथि ३-२ को जित निकालेको हो । 

समूहमा अन्तिम खेलअघि बोरुसिया मुन्छेनग्लाडबाखले शीर्ष स्थानमा रहँदै ८ अंक जोडेको छ। दोस्रो स्थानको शख्तर र तेस्रो स्थानको रियलको समान ७-७ अंक छ। चौथो स्थानको इन्टरको भने ५ अंक रहेको छ । जसका कारण अन्तिम खेलअघि चारै टिमको नकआउट चरणमा पुग्ने सम्भावना छ।

यता समूह 'ए' को खेलमा साविक विजेता जर्मन क्लब वायर्न म्युनिख र स्पेनिस क्लब एट्लेटिको म्याड्रिडले १-१ गोलको बराबरी खेलेर अंक बाडेका छन् ।  यहि समूहको अर्को खेलमा अस्ट्रियन क्लब साल्जवर्गले रसियन क्लब लोकोमोटिभ मस्कोलाई ३-१ ले पराजित गरेको छ। 

यसअघि नै अन्तिम १६ मा पुगेको अंक तालिकाको शीर्ष स्थानमा रहेको वायर्नको १३ अंक छ । दोस्रो स्थानको एट्लेटिको म्याड्रिडको ६ अंक छ । साल्जवर्गको ४ र मस्कोको ३ अंक छ ।