त्रिकोणात्मक सिरिजका लागि क्रिकेट टिम घोषणा, सोमपालको स्थानमा कमलसिंह ऐरी
(काठमाडौं) घरेलु मैदानमा हुने आईसीसी विश्वकप क्रिकेट २ अन्तर्गत त्रिकोणात्मक सिरिजको लागि नेपाली राष्ट्रिय टिमको घोषणा भएको छ ।
नेपाल क्रिकेट संघ (क्यान) ले मुख्य प्रशिक्षक उमेश पटवाल र राखेपका प्रशिक्षक जगत टमाटाको सल्लाहमा १४ खेलाडीको सूची तयार पारेको जनाएको छ । जसमा युवा फास्ट बलर कमल सिंह ऐरीले पहिलो पटक सिनियर टिममा स्थान बनाएका छन् । अनुभवी खेलाडी सोमपाल कामीको स्थानमा कमल समेटिएका हुन् ।
सोमपाल र वसन्त रेग्मीलाई आराम दिँदा कमलसँगै कुशल मल्लले पहिलो पटक एकदिवसीय राष्ट्रिय टिममा स्थान बनाएका छन ।सिरिजमा लागि पोखरामा भएको क्याम्पमा पहिलो चरणमा २४ खेलाडी बोलाइएको थियो । एक साताको क्याम्प र मलेसियासँग ३ खेलको एकदिवसीय सिरिज खेलेपछि नेपाली टोली छनोट भएको हो ।
नेपालमा सिरिज खेल्ने अमेरिका र ओमाननले यसअघि नै टोली घोषणा गरिसकेको छ । तीन राष्ट्र सम्मिलित सिरिज यही माघ २२–२९ गतेसम्म कीर्तिपुरस्थित टीयू अन्तर्राष्ट्रिय क्रिकेट मैदानमा हुनेछ ।
नेपाली टिमको नियमित सदस्य रहेका सोमपाल कामीले पूर्ण फिट नहुँदा सिरिज गुमाउने भएका हुन् । यस्तै वसन्त रेग्मी पारिवारिक कारण क्याम्पमा पनि सहभागी भएका थिएनन् । स्पिनर वसन्तलाई केही दिनअत्रि पुत्रीलाभ भएकाले उनले प्रशिक्षण गुमाएका थिए ।
