काठमाडौं । नेपाली कांग्रेस र नेकपा एमालेबीच सोमबार मध्यरातमा नयाँ सत्ता समीकरणका लागि सहमति पत्रमा हस्ताक्षर भएको छ ।

कांग्रेस सभापति शेरबहादुर देउवा र एमालेका अध्यक्ष केपी ओलीबीच भएको सहमतिमा कुन दलले कति मन्त्रालयले लिने, कुन प्रदेशमा कसले सरकारको नेतृत्वगर्ने र कति समय सरकारको नेतृत्व परिवर्तन गर्ने भन्ने महत्वपूर्ण विषयमा सहमति भएको हो ।

शीर्ष नेताको सहमतिमा शुरुको ढेड वर्ष एमाले अध्यक्ष ओली नेतृत्वमा सरकार बन्ने भएको छ । राष्ट्रिय सहमतिका आधारमा ओली नेतृत्वमा सरकार बन्ने सहमतिको मस्यौदा गरेका एक नेताले जानकारी दिएका हुन् । शुरुमा बन्ने ओली नेतृत्वको सरकारमा एमालेले प्रधानमन्त्री र अर्थमन्त्रीसहित ९ वटा मन्त्रालयको नेतृत्व गर्ने भएको छ भने कांग्रेसले गृहमन्त्रीसहित १० वटा मन्त्रालय लिने भएको हो ।

सहमति अनुसार अब प्रदेश अन्तर्गत एमालेले कोशी, लुम्बिनी र कर्णालीमा सरकारको नेतृत्व गर्ने भएको छ । कांग्रेसले बागमती, गण्डकी र सुदूरपश्चिममा सरकारको नेतृत्व लिने भएको हो। मधेशमा भने मधेशवादी दललाई नेतृत्व दिने सहमति भएको छ। सत्ता सहकार्यसँगै एमाले र कांग्रेसले संविधान संशोधनको सहमति समेत गरेका हुन् ।

संविधान संशोधन सुझाव समिति बनाएर अगाडि बढ्ने सहमति गरेका छन् । सहमतिको औपचारिक पत्र भने नेताहरुले सार्वजनिक गरेका छैनन् । सहमतिको मस्यौदामा सहभागी नेताका अनुसार मंगलबार सहमतिको औपचारिक पत्र सार्वजनिक हुने भएको हो ।

ललितपुरस्थित होटल भिभान्तामा दुवै दलका दोस्रो तहका नेताहरूले तयार पारेको सहमतिको मस्यौदालाई अन्तिम रुप दिएपछि कांग्रेसका सभापति देउवा र एमालेका अध्यक्ष ओलीले सोमबार मध्यरातमा सहमतिमा हस्ताक्षर गरेका थिए ।

दोस्रो तहका नेताले सहमतिलाई अन्तिम रुप दिइसकेपछि अध्यक्ष ओली बालकोटबाट शीतल निवास पुग्नुभएको थियो । कांग्रेस सभापति देउवा पनि मध्यराति शीतल निवास प्रवेश गर्नुभएको हो ।  जहाँ उनीहरूले दुवै दलका दोस्रो तहका नेता पनि राखेर राष्ट«पति रामचन्द्र पौडेलसँग परामर्श गरेका थिए ।

दुई शीर्ष नेताले हस्ताक्षर गरेको सहमति पत्रसहित सबै विवरण मंगलबार सार्वजनिक हुने भएको छ ।