काठमाडौं । प्रधानमन्त्री पुष्पकमल दाहालले विश्व वातावरण दिवसका अवसरमा बुधबार प्रकृति र वातावरण संरक्षणको साझा लक्ष्यमा अघि बढ्न प्रेरणा मिलोस् भनेर शुभकामना व्यक्त गर्नुभएको छ । 

प्रधानमन्त्री दाहालले बुधबार जारी गरेको शुभकामना सन्देशमा मरुभूमिकरण र खडेरीबाट भूमिको पुनःस्थापना गरी पारिस्थितिक प्रणाली पुनःस्थापना गर्ने विषयमा केन्द्रित रहेको सोही दिवसले जलवायु परिवर्तनका असरलाई न्यूनीकरण गर्न तथा वर्तमान, भविष्यका पुस्ताका लागि दिगो र स्वच्छ वातावरण प्रत्याभूत गर्न थप उत्प्रेरित गर्ने विश्वास व्यक्त गर्नुभएको हो ।

उहाँले भूमिको उत्पादनशीलता, प्रकृति तथा वातावरणीय सन्तुलनको आधारमा वैज्ञानिक व्यवस्थापन, उपयोग गर्ने तथा पर्यावरणीय दिगो विकासको सिद्धान्त अवलम्बन गर्दै वातावरणीय सन्तुलन र दिगोपना कायम गर्ने गरी सरकारले नीति तथा कार्यक्रम कार्यान्वयनमा ल्याएको जारी शुभकामना सन्देशमा उल्लेख गर्नुभएको छ ।

प्रधानमन्त्री दाहालले विश्वव्यापीरूपमा भइरहेको जलवायु परिवर्तनको नकारात्मक असर, क्षतिका लागि भूमिका नगण्य भए पनि उल्लेख्य असर भने भोगिरहेको भन्दै नेपालले विभिन्न अन्तर्राष्ट्रिय मञ्चहरूमा राखेका विषयहरू र गरेका प्रतिबद्धतालाई कार्यान्वयन गर्दै जलवायुजन्य क्षतिमा नेपालको अधिकारलाई सुनिश्चित गर्न सरकार क्रियाशील रहेको बताउनुभयो ।

उहाँले संघ, प्रदेश र स्थानीय सरकार, निजी क्षेत्र, नागरिक समाज र राष्ट्रिय तथा अन्तर्राष्ट्रिय संघसंस्था लगायत सबै सरोकारवालाको सामूहिक प्रयासबाट मात्र वातावरण क्षेत्रका चुनौतीलाई सामना गर्न सम्भव रहेको सन्देशमा उल्लेख गर्नुभएको छ ।

प्रधानमन्त्री दाहालले शुभकामना सन्देशमा दिगो विकास, वातावरणमैत्री तथा हरित विकास र समृद्धिलाई ३ वटै तहका नीति तथा कार्यक्रममा प्राथमिकता दिन जरुरी रहेको पनि उल्लेख गर्नुभएको हो ।