काठमाडौं । सार्वजनिक यातायातलाई अपांग र अशक्तमैत्री बनाइने भएको छ।

गृह मन्त्रालयले भौतिक पूर्वाधार तथा यातायात मन्त्रालयलाई पत्राचार गर्दै सार्वजनिक बसमा १ महिनाभित्र अपांगमैत्री र्याम्प (सिंढी) राख्न निर्देशन दिएको हो। सार्वजनिक यातायातलाई अपांग र अशक्तमैत्री बनाउन सार्वजनिक बसमा १ महिनाभित्र र्याम्प (सिंढी) राख्न सम्बन्धित मन्त्रालयबाट यातायात व्यवसायी सम्बद्ध संघसंस्थाहरूलाई निर्देशन गर्नका लागि यहि जेठ १७ गते सचिवस्तरीय निर्णय गरी पत्रचार गरिएको जनाइएको छ।

अपांगता भएका तथा अशक्त व्यक्तिहरुलाई आवागमनमा सहज होस् भन्नका लागि सार्वजनिक बसमा अनिवार्य अपांगतामैत्री र्याम्प राख्न निर्देशन दिइएको मन्त्रालयका सचिव एकनारायण अर्यालले जानकारी दिनुभयो। परिवार तथा राज्यबाट नै विशेष हेरचाह आवश्यक पर्ने अपांग र अशक्त भएका व्यक्तिहरुलाई सार्वजनिक यातायातमा सहज होस् भनेर यो निर्णय गरिएको उहाँको भनाइ छ ।

समाज तथा राज्यले समेत विशेष प्राथमिकतामा राख्नुपर्ने भन्दै प्रत्येक क्षेत्रबाट यसैगरी उनीहरुलाई सहज हुने वातावरण सिर्जना गर्दै जानुपर्ने गृह सचिव अर्यालले बताउनुभयो ।