काठमाडौं । प्रधानमन्त्री पुष्पकमल दाहालले राष्ट्र- वर्ग र जनताका लागि फेरि एउटा नयाँ आन्दोलन गर्ने तयारीमा रहेको बताउनुभएको छ ।

काठमाडौंमा बिहीबार जनसांस्कृतिक महासंघ नेपालको राष्ट्रिय सम्मेलनलाई उद्घाटन गर्दै उहाँले यस्तो बताउनुभएको हो । क्रान्तिको बाटो सरल रेखामा नजाने बताउँदै उहाँले सरकारको तर्फबाट सुशासन, सामाजिक न्याय र समृद्धिको मात्रै कुरा नगरिएको बताउनुभएको हो ।

सरकारले आगामी आर्थिक वर्षको नीति तथा कार्यक्रम र बजेटलाई गम्भीरताका साथ हेर्ने हो भने समाजवादको बीउ रोप्ने प्रयास गरिएको उहाँले उल्लेख गर्नुभयो ।प्रधानमन्त्री दाहालले समाजवादको निम्ति एकता आवश्यक रहेको पनि बताउनुभएको हो । सामाजिक न्याय, सुशासन र समृद्धिको कुरा गर्नुको तात्पर्य समाजवादको आधार तयार पार्नु रहेको उहाँले बताउनुभयो ।

कृषिलाई आधार बनाएर र आईटीलाई अगाडि बढाएर मात्रै समाजवादी यात्रामा अघि बढ्न सक्ने उहाँको भनाइ छ । समाजवादको सोच र रुपान्तरणको अभियान साँस्कृतिक रुपान्तरणको अभियान भएको उहाँले बताउनुभयो ।

प्रधानमन्त्री दाहालले सामन्तवादी संस्कृतिले खडा गरेको रूढीवाद, अन्धविश्वास र अन्धभक्तिलाई पाखा लगाएर समाजवादी संस्कृतिको जग बसाल्नु पर्नेमा जोड दिनुभएको छ । समाजवादी साँस्कृतिक आन्दोलनलाई उठाउन सामाजिक रूपान्तरण आवश्यक भएको पनि उहाँको भनाइ थियो ।