काठमाडौं । नेपाली कांग्रेसका महामन्त्री गगनकुमार थापाले संसद अधिवेशन अन्त्य गर्ने तयारीमा सरकार लागेपछि संसदीय छानबिन समितिमा गृहमन्त्री रवि लामिछानेको नाम उल्लेख गर्नुपर्ने शर्तबाट आफूहरू पछि हटेको दावी गर्नुभएको छ ।

बिहीबार साँझ एक भिडियो सन्देश जारी गर्दै प्रतिनिधि सभाका सांसद समेत रहेका थापाले सरकारले केही दिन संसद पेलेरै चलाएर अधिवेशन अन्त्य गर्न खोजेपछि आफूहरू सम्झौतामा जानुपरेको बताउनुभएको हो । संसद अधिवेशन अन्त्य गरेर सरकार समिति नबनाउने दिशामा अघि बढेपछि गृहमन्त्री लामिछानेको नाम नराखेर भए पनि समिति बनाउने कुरामा सहमति गरिएको उहाँको भनाइ छ ।

नेपका एमालेका सांसद सूर्य थापाको संयोजकत्वमा बनेको संसदीय समितिले आफूहरूका एजेण्डालाई सम्बोधन गर्ने पनि उहाँले दावी गर्नुभयो । तत्कालीन समयमा गोर्खा मिडियाका शेयर धनी र सञ्चालक समेत रहेका गृहमन्त्री लामिछाने सहकारी अपचलनमा संलग्‍न रहेको तथ्य र प्रमाणले पुष्टि गर्ने उहाँले बताउनुभएको छ ।

गृहमन्त्री लामिछानेले संसदको रोस्ट्रमबाट ‘संसदीय होइन, अन्तर्राष्ट्रिय नै बनाए पनि हुन्छ’ भने पनि नाम उल्लेख गरेर समिति बनाउन नमानेको पनि उहाँले जिकिर गर्नुभयो । नेकपा एमालेका अध्यक्ष केपी शर्मा ओलीतर्फ लक्षित गर्दै नाम लिंदा पनि उहाँ रिसाउने अवस्था रहेको सांसद थापाले उल्लेख गर्नुभएको छ ।

मुख्य कुरा सहकारीको रकम अपचलनमा गृहमन्त्री लामिछानेको संलग्नता रहेको कुरालाई तथ्य, तर्क र प्रमाणहरूले पुष्टि गर्ने उहाँको तर्क छ । जसको आधारमा अनुसन्धान हुने कुरालाई निश्चित गर्नुपर्ने र अनुसन्धान हुने कुरालाई निश्चित गर्नु कांग्रेसका लागि मुख्य कुरा भएको सांसद थापाले बताउनुभयो ।