एसियाली खेलकुद : नेपालकी एरिका गुरुङले कम्तिमा रजत पदक जित्ने पक्का
चीनको हाङझाउमा जारी १९औं एसियाली खेलकुदमा नेपालकी एरिका गुरुङले कम्तिमा रजत पदक जित्ने पक्का भएको छ।
शनिबार हाङझाउमा एरिकाले ६८ केजी तौल समूहमा फाइनलमा स्थान पक्का गरेसँगै नेपालको रजत पदक पक्का भएको हो।
उनले क्वार्टरफाइनलमा जापानकी खेलाडीलाई पराजित गर्दै सेमिफाइनलमा स्थान बनाइन्।
जापानकी युजुकीसँग १-१ अंकको बराबरी भएको थियो। त्यसपछि पहिलो अंक एरिकाले लिएका कारण उनी सेमिफाइनल पुगिन्।
सेमिफाइनलमा उनले हङकङकी हो काइ यानलाई ८-४ अंकले पराजित गरिन्।
उनले अब स्वर्णका लागि काजकिस्तानकी सेफ्या बेलुरुसेभासँग प्रतिस्पर्धा गर्दैछिन्। एरिका व्यक्तिगत स्पर्धामा कम्तिमा रजत जित्ने नेपालकी दोस्रो खेलाडी हुन्।
नेपालका लागि एसियाली खेलकुदमा पहिलो रजत सविता राजभण्डारीले १९९८ बैंकक एसियाली खेलकुदमा तेक्वान्दोबाट जितेकी थिइन्।
एरिकाले गत साता इन्डोनेसियामा भएको विश्व सितोरियो कराते च्यम्पियनसिपमा उत्कृष्ट प्रदर्शन गर्दै स्वर्ण जितेकी थिइन्।
