भारत भ्रमणमा रहेका माओवादी केन्द्रका नेताहरुले त्यहाँका विदेश मन्त्री एस. जयशंकरसँग भेट गर्न प्रयासरत रहे पनि समय पाउन सकिरहेका छैनन् ।  भारतीय जनता पार्टीको निमन्त्रणामा माओवादीका उपाध्यक्ष पम्पा भुसालको नेतृत्वमा पाँच सदस्यीय टोली साउन ७ गते दिल्ली पुगेको छ ।

भाजपाको हेडक्वाटर दुई पटक पुगेर भाजपाका अध्यक्ष लगायतका विभिन्न नेतासँग भेटघाट तथा छलफल गरेका उनीहरुले हालसम्म भारतीय विदेश मन्त्रीलाई भेट्न पाएका छैनन् । त्यसो त भारतीय विदेश मन्त्री एस.जयशंकरलाई भेट्ने कार्यतालिका थिएन । तर भाजपाकै तर्फबाट विदेशमन्त्री एस.जयशंकरसँग भेट गराउने प्रयास भइरहेको छ ।

भ्रमण टोलीमा रहेका एक नेताका अनुसार मंगलबार नै भारतीय विदेशमन्त्री एस.जयशंकरसँग भेट्ने कार्यक्रम थियो । मन्त्रीको सचिवालयबाट समय मिलाउने प्रयास भइरहेको भन्ने खबर आए पनि समय मिल्न नसकेको उनले बताए ।

माओवादीका नेताहरुले विदेशमन्त्रीसँग भेट गर्ने प्रतीक्षामा अन्य कुनै कार्यक्रम बनाएनन् । उनीहरु भारतीय विदेश मन्त्रीसँग भेट गर्ने समय कुर्दै दिनभर होटलमै बसे तर भेट हुन पाएन ।

बुधबार माओवादी नेताहरु देहरादुनका लागि हिँडिसकेका छन् । त्यहाँ आज साँझ ऋषिकेशमा गंगा आरती गर्नुको साथै भाजपाका नेताहरुसँग भेटघाट गर्ने कार्यक्रम छ । भोलि वा पर्सिसम्म पनि भारतीय विदेशमन्त्रीसँग भेट्ने सम्भावना रहेको भ्रमणमा रहेका एक नेताले बताए ।

माओवादीका नेताहरु साउन १२ गते फर्किदैछन् । माओवादीका नेताहरुले आज भारतस्थित नेपाली दुतावासमा गएर नेपाली राजदूत डा.शंकरप्रसाद शर्मासँग छलफल तथा भेटघाट गरेका छन् ।