नेपाल र अफगानिस्तानबीच कतारमा हुने भनिएको दुई अन्तर्राष्ट्रिय मैत्रीपूर्ण फुटबल नहुने भएको छ ।एन्फाले एक महिना अघि कुवेतमा हुने एएफसी एसियन कप छनोटको तयारी स्वरुप नेपालले जेठ ११ र १५ गते कतारमा अफगानिस्तानसँग मैत्रीपूर्ण खेल खेल्ने जानकारी गराएको थियो ।

तर अब भने दुवै खेल नहुने भएको अखिल नेपाल फुटबल संघ (एन्फा)का महासचिव इन्द्रमान तुलाधरले जानकारी दिए । ‘यसअघि अफगानिस्तान पनि कतारमा आउने भएकोले खेल हुने भनिएको थियो । तर, अब अफगानिस्तानको टिम पनि कतार नजाने भयाे,’ तुलाधरले अनलाइनखबरसँग भने ।

नेपालले यही जेठ अन्तिम साता कुवेतमा एसियन कप छनोट खेल्दैछ । त्यसैको तयारीमा रहेको नेपाली टिमले दशरथ रंगशालमा विदेशी खेलाडी सम्मिलित एभेनियर एफसी दाउलासँग पाँच अभ्यास खेल खेलिसकेको छ ।