जापानमा भइरहेको टोकियो ओलम्पिकमा अष्ट्रेलियन स्वीमर एम्मा म्याकेओनले चार स्वर्णसहित सात पदक जितेर सन् १९५२ को हेलसिन्की ओलम्पिकमा सोभियन युनियनकी जिम्न्यास्ट मारिया गोरोखोभ्स्काले बनाएको कीर्तिमान बराबरी गरेकी छन् ।

एम्माले एकै ओलम्पिकमा सर्वाधिक पदक जित्ने महिला खेलाडीको कीर्तिमान बराबरी गरेकी हुन् ।

एम्माले टोकियोमा सातौं पटक आइतबार चार गुणा १०० मिटर मिडले रिलेमा जितेकी हुन् । जसले उनलाई एउटै ओलम्पिकमा धेरै पदक जित्ने महिला स्वीमर समेत बनायो । त्यसअघि आइतबारै एम्माले ५० मिटर फ्रिस्टाइलमा ओलम्पिक कीर्तिमानसहित स्वर्ण जितेकी थिइन् ।

एस्मा सात वा त्यो भन्दा बढी पदक जित्ने सूचीमा माइकल फेल्प्स, मार्क स्पिट्ज र माट बिओन्डीससंगै समावेश भएकी छन् । अमेरिकन लेजेण्ड स्वीमर फेल्प्सले २००८ को बेइजिङ ओलम्पिकमा ८ स्वर्ण जितेका थिए ।

ब्रिसबनकी २७ वर्षीय एम्मा ओलम्पिकमा ७ पदक जित्ने पहिलो महिला स्वीमर बनेकी छन् । एम्माले सन् २०१६ को रियो ओलम्पिकमा पनि ४ पदक जितेकी थिइन् । उनले ओलम्पिक कूल ११ दक जित्दै आफ्नै देशका इयान थोर्प, लेइसन जोन्स जस्ता खेलाडीलाई पछि पार्दै अष्ट्रेलियाको मोस्ट डेकोरेटेड ओलम्पिन बनेकी छन् ।

एम्माले टोकियो ओलम्पिकमा चार गुणा १०० मिटर फ्रिस्टाइल रिले, १०० मिटर फ्रिस्टाइल, ५० मिटर फ्रिस्टाइल र चार गुणा १०० मिटर मिडले रिलेमा स्वर्ण जित्दा १०० मिटर बटरफ्लाई, चार गुणा २०० मिटर फ्रिस्टाइल रिले र चार गुणा १०० मिटर मिक्सड मिडले रिलेमा कांस्य जितिन् ।