फिफा विश्वकप कतार २०२२ अन्तर्गत दक्षिण अमेरिकी छनोटमा ब्राजिलले लगातार चौथो खेलमा जित हात पारेको छ।

ब्राजिलले बुधबार विहान सकिएको खेलमा उरुग्वेलाई २-० गोलले पराजित गर्‍यो। उरुग्वेमा भएको खेलमा ब्राजिलका लागि अर्थरले ३३ मिनेटमा पहिलो गोल गरे। रिचार्लीसनले ४५ मिनेटमा ब्राजिलको अग्रता दोब्बर पारेका थिए। 

खेलको ७१ मिनेटमा उरुग्वे १० खेलाडीमा सीमित बनेको थियो। उरुग्वेका फरवार्ड इडिन्सन काभानीलाई रेफ्रीले सिधा रातो कार्ड देखाउँदै मैदान बाहिर पठाएका थिए। रिचार्लीसनमाथि फउल गरेपछि काभानीलाई रातो कार्ड देखाइएको थियो।

यता अर्जेन्टिनाले पेरूमाथि २-० गोलको जित हात पारेको छ। अर्जेन्टिनाको जितमा गोन्जालेजले १७ मिनेटमा पहिलो गोल गरेका थिए। २८ मिनेटमा लाउट मार्टिनेजले अर्जेन्टिनाको अग्रता दोब्बर परेका थिए।

दक्षिण अमेरिकी छनोटका अन्य खेलमा इक्वेइडरले कोलम्बियालाई ६-१ गोल तथा भेनेजुएलाले चिलीलाई २–१ गोलले पराजित गरेका छन्।  पाराग्वे र बोलिभियाबीचको खेल भने २–२ गोलको बराबरीमा सकिएको छ।  दक्षिण अमेरिकी छनोटको चौथो चरणको खेल सकिदा ब्राजिल लगातार चार जितबाट १२ अंक जोडेर शीर्ष स्थानमा छ।

दोस्रो स्थानको अर्जेन्टिनाको १० अंक छ भने तेस्रो स्थानको इक्वेइडरको ९ अंक रहेको छ।