बुटवल । साढे ७ किलो अफिमसहित कपिलवस्तुबाट दुई जनालाई प्रहरीले नियन्त्रणमा लिएको छ । इलाका प्रहरी कार्यालय कृष्णनगरको टोलीले  चेकजाँच गर्ने क्रममा मंगलबार कृष्णनगर नगरपालिका वडा नम्बर २ पिपलबोटको चेक प्वाइन्टबाट एक महिला र एक जना पुरुष अटो चालकलाई  अफिमसहित नियन्त्रणमा लिएको जिल्ला प्रहरी कार्यालय कपिलवस्तुले जनाएको छ ।

प्रहरीले चन्द्रौटाबाट कृष्णनगरतर्फ आउँदै गरेको लु १ ह १५७ नम्बरको अटोमा सवार रोल्पा जिल्ला कुलेरी गाँउपालिका १ कुरेली बस्ने ४९ वर्षकी सीता रोकालाई शंका लागि चेकजाँच गर्दा निजले बोकेर ल्याएको झोलाबाट साढे ७ किलो अफिम बरामद गरेको कपिलवस्तुका प्रहरी उपरीक्षक नवराज अधिकारीले जानकारी दिए 

चालकको सिट पछाडि अटोमा बसेकी उनले हातमा छोपेको लेडिज ब्यागमा २ केजी र पछाडि राखेको रेग्जिनको झोलामा रहेको साढे ५ केजी गरी सो परिमाणको अफिम भेटिएको हो । रोकासँगै प्रहरीले अटो चालक कपिलवस्तु जिल्ला शिवराज नगरपालिका वडा नम्बर ५ का २० वर्षीय सुशील क्षेत्रीलाई समेत नियन्त्रणमा लिई थप अनुसन्धान गरिरहेको छ । 

यसअघि असोज ७ गते पनि कृष्णनगरबाट ३७ केजी चरेससहित दुई महिलालाई प्रहरीले नियन्त्रणमा लिएको थियो । 

साभारः रातोपाटी