सेवाग्राहीसँग ५० हजार रुपैयाँ घुस मागेको आरोपमा नापी कार्यालय कलंकीका तत्कालीन दुई कर्मचारीविरुद्ध भ्रष्टाचार मुद्दा दायर भएको छ।

अख्तियार दुरुपयोग अनुसन्धान आयोगले तत्कालीन सर्भेक्षक अमित कुमार श्रेष्ठ र नापी अधिकृत हिरालाल पार्धे विरुद्ध विशेष अदालतमा आरोपपत्र दायर गरेको हो।

आयोगका अनुसार काठमाडौंको चन्द्रागिरि नगरपालिका–९ मा रहेको जग्गा हालसाबिक गरी प्लट मिलान गरिदिने भन्दै दुवै कर्मचारीले सेवाग्राहीसँग ५० हजार रुपैयाँ घुस मागेका थिए।

अनुसन्धानका क्रममा नियमअनुसार गर्नुपर्ने काम नगरी सेवाग्राहीलाई दुःख–हैरानी दिएको र काम गरिदिने बहानामा घुस रकमका लागि बार्गेनिङ गरेको पुष्टि भएको अख्तियारले जनाएको छ।

आयोगका अनुसार श्रेष्ठ र पार्धेले आफूहरूले घुस रकम प्राप्त गर्ने तथा कानुनी कारबाहीबाट समेत उन्मुक्ति पाउने उद्देश्य राखेका थिए। उनीहरूले रकम आफैंले प्रत्यक्ष नलिई कार्यालय सहयोगीमार्फत ५० हजार रुपैयाँ लिन सहमति जनाएकोसमेत अनुसन्धानबाट खुलेको अख्तियारको दाबी छ।

उक्त कार्य भ्रष्टाचार निवारण ऐन, २०५९ को दफा ३ को उपदफा (१) बमोजिमको कसुर भएको ठहर गर्दै आयोगले दुवै जनाविरुद्ध ५० हजार रुपैयाँ बिगो कायम गरेको छ।

अख्तियारका प्रवक्ता सुरेश न्यौपानेका अनुसार दुवै जनालाई भ्रष्टाचार निवारण ऐनबमोजिम कैद तथा बिगो बराबर जरिवाना हुनुपर्ने मागदाबीसहित विशेष अदालतमा आरोपपत्र दायर गरिएको हो।