श्रम संस्कृति पार्टीले नेपालमा विदेशी सहयोगमा सञ्चालित राजनीतिक तथा नेतृत्व विकासका कार्यक्रमबारे सरकारले स्पष्ट विवरण सार्वजनिक गर्नुपर्ने माग गरेको छ।

प्रतिनिधि सभाको बिहीबारको बैठकमा विशेष समय लिएर पार्टीका प्रमुख सचेतक आरेन राईले द ग्रे जोन मा प्रकाशित रिपोर्ट तथा सार्वजनिक कागजातले नेपालमा विदेशी सहयोगमा सञ्चालित राजनीतिक, नेतृत्व विकास र युवा परिचालनसम्बन्धी कार्यक्रममाथि गम्भीर प्रश्न उठाएको बताए।

राईले कुनै व्यक्तिको नाम सार्वजनिक कागजातमा उल्लेख हुँदैमा त्यसलाई विदेशी हस्तक्षेपको प्रमाण मान्न नसकिने स्पष्ट गर्दै सरकारले उठेका प्रश्नको जवाफ दिनुपर्ने बताए।

उनले नेपालमा विदेशी सरकार वा संस्थाको सहयोगमा सञ्चालित राजनीतिक, नेतृत्व विकास तथा युवा परिचालनसम्बन्धी कार्यक्रमको विवरण, बजेट र उद्देश्य सार्वजनिक गर्न सरकारसँग माग गरे। त्यस्तै, त्यस्ता कार्यक्रमबाट कुन संस्था वा व्यक्तिले कस्तो तालिम तथा आर्थिक सहयोग प्राप्त गरे भन्ने सम्पूर्ण विवरण संसद्मा पेस गर्नुपर्ने उनको भनाइ थियो।

विदेशी सहयोग राजनीतिक दलको निर्वाचन, नेतृत्व निर्माण वा सत्ता परिवर्तनमा प्रयोग भएको हो वा होइन भन्ने विषयमा स्वतन्त्र र निष्पक्ष छानबिन गर्नुपर्ने मागसमेत राईले राखे। भविष्यमा नेपालको राजनीति र निर्वाचनमा विदेशी प्रभाव रोक्न स्पष्ट कानुनी मापदण्ड तथा संसदीय निगरानीको व्यवस्था गर्नुपर्ने उनले बताए।

सामाजिक सञ्जालमा द ग्रे जोन को विषयलाई लिएर भइरहेको चर्चाप्रति टिप्पणी गर्दै राईले सत्तापक्ष र केही दलका नेतामाथि राजनीतिक प्रतिशोधको आरोप पनि लगाए।

उनले जेनजी आन्दोलनलाई कुनै दल वा व्यक्तिविशेषसँग जोडेर हेर्न नहुने बताए। उनका अनुसार आन्दोलन एउटा उमेर समूहको सहभागितामा भएको भएकाले त्यसलाई राजनीतिक दल वा व्यक्तिसँग जोडेर व्याख्या गर्नु उचित हुँदैन।

राईले नेपालको राजनीतिक भविष्य नेपाली जनताको मत, संविधान र नेपाली जनताको स्वार्थबाट निर्देशित हुनुपर्नेमा जोड दिए। मित्रराष्ट्रसँग सन्तुलित सम्बन्ध विस्तार गर्ने पक्षमा रहेको उल्लेख गर्दै उनले नेपालको राजनीतिक भविष्यबारे निर्णय गर्ने अधिकार नेपाली जनतामै रहेको बताए।