काठमाडौँ, ६ पुस ।
सञ्चार तथा सूचना प्रविधिमन्त्री जगदीश खरेलले जिम्मेवारी सम्हालेको तीन महिनामा गरेका ३० प्रमुख उपलब्धि सार्वजनिक गरेका छन्। गत असोज ६ गते सञ्चारमन्त्री बनेका खरेलले आज आमसञ्चार, दूरसञ्चार, सूचना प्रविधि, हुलाक सेवा, मुद्रण, चलचित्रलगायत विभिन्न क्षेत्रमा भएका उपलब्धिहरू सार्वजनिक गरेका हुन्।

कार्यक्रममा मन्त्री खरेलले चुनौतीपूर्ण परिस्थितिबीच पनि उल्लेखनीय प्रगति हासिल भएको बताउँदै आगामी दिनमा अझ इमान्दारिता र प्रतिबद्धताका साथ काम गर्ने प्रतिबद्धता व्यक्त गरे।

उनका अनुसार यस अवधिमा सूचना तथा प्रसारण विभागबाट अनलाइन दर्ता तथा नवीकरण प्रणाली सुरु गरिएको छ भने सुरक्षण मुद्रण केन्द्रमार्फत सवारी चालक अनुमतिपत्र (लाइसेन्स) छपाइको काम अघि बढाइएको छ। दुर्गम क्षेत्रमा दूरसञ्चार पहुँच विस्तार गर्नुका साथै सगरमाथा आधार शिविरमा फोरजी सेवा विस्तारजस्ता महत्वपूर्ण काम सम्पन्न भएका छन्।

दूरसञ्चार क्षेत्रमा निःशुल्क वाइफाइ इन्टरनेट सेवाअन्तर्गत काठमाडौँ उपत्यकाका १९ वटा सार्वजनिक स्थानमा वाइफाइ जडान गरिएको र उपत्यका बाहिर २९ स्थानमा जडानका लागि प्रक्रिया अघि बढाइएको जानकारी पनि मन्त्री खरेलले दिए।

सुदूरपश्चिम प्रदेशमा १५ वटा वायरलेस साइट जडान, नेपाल टेलिकमका सक्रिय ग्राहक संख्या दुई लाखले वृद्धि, ‘जेनजी’ डाटा प्याक कार्यान्वयन, एभरेष्ट बेस क्याम्पमा फोरजी सेवा विस्तार लगायतका कामलाई पनि उनले प्रमुख उपलब्धिका रूपमा उल्लेख गरे।

यसैगरी, जेनजी आन्दोलनका घाइते पत्रकारलाई सम्मान, आन्दोलनबाट भएको क्षतिको विवरण संकलन, तथा सरकारी सञ्चार माध्यममा कार्यरत पत्रकार र कर्मचारीलाई सामाजिक सुरक्षा कोषमा आबद्ध गराउने कामलाई समेत महत्वपूर्ण उपलब्धि मानिएको छ।