काठमाडौं। लुम्बिनी लायन्सले नेपाली प्रिमियर लिग (एनपीएल) २०२५ को दोस्रो संस्करणमा प्लेअफमा पुग्ने चौथो टोली बनेको छ। शुक्रबार कीर्तिपुरस्थित टीयू अन्तर्राष्ट्रिय क्रिकेट स्टेडियममा भएको खेलमा लुम्बिनीले डिफेन्डिङ च्याम्पियन जनकपुर बोल्ट्सलाई ४ विकेटले पराजित गर्दै पहिलोपटक प्लेअफमा स्थान बनाएको हो।

जनकपुरले २० ओभरमा ६ विकेट गुमाएर १३२ रन बनाएको थियो। लुम्बिनीले १९.१ ओभरमा ६ विकेट गुमाएर १३३ रनको लक्ष्य पूरा गर्दै जित हात पारेको थियो। लुम्बिनीका कप्तान रोहित पौडेलले सर्वाधिक ३४ रन बनाएका थिए भने डार्शी सर्टले ३०, जेजे स्मिथले २१ र निरोशन डिकवेलाले १७ रन योगदान गरे।

खेलमा लुम्बिनीले ओपनर सुमित महर्जनलाई पहिलो बलमै गुमाए पनि डार्शी सर्ट र रोहित पौडेलले दोस्रो विकेटका लागि ६१ रनको महत्वपूर्ण साझेदारी गर्दै इनिङ्स सम्हाले। जनकपुरका मयन यादवले रोहित र सन्दिप जोरा गरी दुई विकेट लिए। बलिङमा लुम्बिनीका शेर मल्ल र कप्तान रोहित पौडेलले २-२ विकेट लिए भने जेजे स्मिथ र रुबेन ट्रम्पल्मयानले १-१ विकेट लिए।

यस जितसँगै प्लेअफमा पुग्ने चारै टोली पक्का भएको छ। यसअघि सुदूरपश्चिम रोयल्स, काठमाण्डु गोर्खाज र विराटनगर किंग्सले प्लेअफमा स्थान बनाइसकेका थिए। सुदूरपश्चिम पहिलो क्वालिफायर खेल्नेछन् भने लुम्बिनीले एलिमिनेटर खेल्नेछ। शनिबार हुने सुदूरपश्चिम र विराटनगरको खेलपछि दोस्रो र तेस्रो स्थान पक्का हुने अपेक्षा छ।