पहिलो पटक आयोजना हुन लागेको दर्ष्टिविहिन महिला टी२० विश्वकपक क्रिकेटको पहिलो खेलमा नेपाली राष्ट्रिय दृष्टिविहिन महिला क्रिकेट टिमले श्रीलंकासँग खेल्ने भएको छ ।

क्रिकेट एसोसिएसन अफ द ब्लाइन्ड नेपाल (क्याब नेपाल)का अनुसार नेपालले नोभेम्बर १२ मा श्रीलंकासँग भारतको नयाँ दिल्लीमा खेल्नेछ ।

दृष्टिविहिन महिला टी२० विश्वकप क्रिकेट नोभेम्बर ११ देखि २३ सम्म भारत र श्रीलंकामा आयोजना हुँदैछ । सुरुमा भारतसँगै नेपाल पनि सहआयोजको रुपमा थियो । तर जेनजी आन्दोलनका कारण नेपालको राजनीतिक परिस्थितीका कारण नेपालको सट्टा श्रीलंकामा खेल खेलाउन लागिएको हो ।

पहिलो पटक हुन लागेको यस विश्वकपमा नेपालसहित आयोजक भारत र श्रीलंका, पाकिस्तान, अष्ट्रेलिया, बेलयात र अमेरिकाले सहभागिता जनाउनेछन् ।

दृष्टिविहिन महिला टी२० विश्वकपको खेलहरु सिंगल राउण्ड रोविनका आधारमा हुनेछ ।

नेपालले दोस्रो खेल भारतसँग बेंगलुरुमा नोभेम्बर १४ मा खेल्नेछ । यस्तै तेस्रो खेल इंग्ल्याण्डसँग नोभेम्बर १५ र चौथो खेल अमेरिकासँग नोभेम्बर १६ मा बेगालुरुमै खेल्नेछ ।

त्यसपछि नेपाली टोली श्रीलंकाको कोलोम्बो जानेछ । जहाँ नेपालले अष्ट्रेलियासँग नोभेम्बर १८ मा र पाकिस्तानसँग नोभेम्बर १९ मा खेल्नेछ ।

लिग चरणका खेलपछि शीर्ष चारमा रहने टोली सेमिफाइनल प्रवेश गर्नेछन् । सेमिफाइनल र फाइनल खेल कोलोम्बोमै हुनेछ ।

पहिलोपटक हुने दृष्टिविहिन महिला टी–२० विश्वकप क्रिकेटका लागि गीता पौडेलको कप्तानीमा १६ सदस्यीय राष्ट्रिय टोली घोषणा भइसकेको छ ।

टोलीका मुख्य प्रशिक्षकका रूपमा पूरनसिंह खत्री, सहायक प्रशिक्षकका रूपमा नहेन्द्र निरौला र टोली व्यवस्थापकका रूपमा भगवती भट्टराई बराल छन् ।

नेपाली टोलीले काठमाडौंको केही दिन प्रशिक्षणपश्चात पोखरा गएको छ । अब पोखरामा प्रशिषण गर्ने क्याब नेपालले जनाएको छ ।

दृष्टिविहिन महिला क्रिकेटको सुरुवात सन् २००६ मा नेपालबाटै भएको थियो । त्यसपछि यो खेल भारत, इंग्ल्यान्ड, अष्ट्रेलिया, पाकिस्तान र अमेरिका लगायत देशमा फैलिएको छ ।

नेपाली महिला टोलीले सन् २०१४ पुल्चोकमा बेलायतको टोलीसँग सिरिज खेलेको थियो । त्यसपछि सन् २०१९ मा पाकिस्तान गएर सिरिज खेलेको थियो । त्यसपछि नेपाल र भारतको दृष्टिविहिन महिला क्रिकेट टोलीबीच नेपाल र भारत दुवै देशमा सिरिज आयोजना भएको थियो ।