राष्ट्रिय पुरुष रग्बी फिप्टिन्स च्याम्पियनसिप आजदेखि च्यासल मैदानमा सुरू भएको छ । नेपाल रग्बी संघले आयोजना गरेको चौथो राष्ट्रिय फिप्टिन्स च्याम्पियनसिप आगामी वैशाख २ गतेसम्म चल्नेछ । 

विदेशी निर्णायकको सहभागितामा राष्ट्रिय फिप्टिन्स रग्बी प्रतियोगिता राष्ट्रिय स्तरका क्लबमा तीन विभागीय टोली त्रिभुवन आर्मी, नेपाल पुलिस, एपीएफ क्लब र गोर्खाली रग्बी क्लबले भाग लिएका छन् । 

उद्घाटन खेलमा आज एपीएफ क्लब र गोर्खाली रग्बी क्लब भिडे । खेलको मुख्य निर्णायकमा श्रीलंकाका प्रियान्था गुणारत्ने छन् भने  म्याच रेफ्री पनि श्रीलंकाकै सुरंगा अरुणा छन् । 

खेलका लागि नेपाली रेफ्री भने प्रेमबहादुर कोइराला छन् । नेपाल रग्बी संघले अघिल्लो वर्षदेखि यस प्रतियोगिताको ट्रफीलाई रनिङ सिल्डको रूपमा राखेको थियो । गत वर्षको विजेता गोर्खाली रग्बी क्लब हो । 

सहभागी चारै क्लबलाई तयारी तथा प्रतियोगितामा बिमा र स्वास्थ्य व्यवस्थापनसहित तीन लाख बराबरको रकम प्रदान गरिएको संघले जनाएको छ । यो पटकको विजेताले २ लाख २२ हजार २ सय २२ रुपैयाँसहित रनिङ सिल्ड जित्नेछ ।  उपविजेताले १ लाख ११ हजार १ सय ११ रुपैयाँ प्राप्त गर्नेछ । उत्कृष्ट खेलाडीले १५ हजारसहित ट्रफी पाउनेछन् ।