काठमाडौं । सरकारले नेपाली कांग्रेससहितको सत्ता गठबन्धनको पालामा नियुक्त गरिएका भारत, अमेरिका र बेलायतसहित ११ देशका राजदूतहरूलाई फिर्ता बोलाएको छ ।

बिहीबार साँझ सिंहदरबारमा बसेको मन्त्रिपरिषदको बैठकले तत्कालीन कांग्रेससहितको सत्ता गठबन्धनको पालामा नियुक्त भएका राजदूतहरूलाई फिर्ता बोलाउने निर्णय गरेको हो ।

सञ्चार तथा सूचना प्रविधिमन्त्री रेखा शर्माले भारत, बेलायत, अमेरिका, दक्षिण कोरिया, कतार, साउदी अरब, मलेसिया, स्पेन, पोर्चुगल, डेनमार्क र इजरायलका राजदूतहरूलाई फिर्ता बोलाउने निर्णय भएको बताउनुभयो ।

प्रधानमन्त्री पुष्पकमल दाहालले यसअघि नै गठबन्धनको शीर्ष तहमा कांग्रेसको कोटामा नियुक्त राजदूतहरूलाई फिर्ता बोलाउने सहमति बनाउनुभएको थियो ।

सरकारले भारतका लागि नेपाली राजदूत डा. शंकरप्रसाद शर्मा, बेलायतका लागि नेपाली राजदूत ज्ञानचन्द्र आचार्य, अमेरिकाका लागि नेपाली राजदूत प्रा. श्रीधर खत्री, इजरायलका लागि नेपाली राजदूत कान्ता रिजाल, दक्षिण कोरियाका लागि नेपाली राजदूत प्रा.डा. ज्योति प्याकुरेल (भण्डारी), कतारका लागि नेपाली राजदूत नरेशविक्रम ढकाल र मलेसियाका लागि नेपाली राजदूत डिल्लीराज पौडेलसहितलाई फिर्ता बोलाएको हो ।

त्यसैगरी फिर्ताको सूचीमा स्पेन, पोर्चुगल र डेनमार्कका राजदूत पनि परेको मन्त्री शर्माले बताउनुभयो ।