वुमन्स प्रिमियर लिगमा गुजरात जायन्ट्सले लगातार चौथो खेलमा हार बेहोरेको छ । आइतबार दिल्ली क्यापिटल्ससँग गुजरात २५ रनले पराजित भएको हो । अब गुजरातले प्रतियोगितामा टिक्नका लागि हरेक खेल जित्नुपर्नेछ । उसको ४ खेल बाँकी छ ।

बैंगलुरुको एम चिन्नास्वामी स्टेडियममा आइतबार भएको खेलमा गुजरात जायन्ट्सले टस जितेर पहिले फिल्डिङ रोजेको थियो । ब्याटिङ गर्दै दिल्लीले २० ओभरमा ८ विकेट गुमाएर १६३ रन बनायो । दिल्लीकी कप्तान मेग ल्यानिङले ५५ रनको अर्धशतकीय इनिङ खेलिन् ।  गुजरातका लागि मेघना सिंहले उत्कृष्ट बलिङ गर्दै चार विकेट पूरा गरिन्। मेघनाका अलावा एस्ले गार्डनरले दुई विकेट लिए । त्यस्तै तनुजा कंवर र मन्नत कश्यपले एक–एक विकेट लिए ।

जवाफमा गुजरातले २० ओभरमा ८ विकेट गुमाएर १३८ रन मात्रै बनाउन सक्यो । गुजरातको ब्याटिङ पूर्ण रुपमा असफल रह्यो । टोलीका लागि १५+ रन बनाउने एकमात्र ब्याट्सम्यान एस्ले गार्डनर थिइन् । उनले ४० रनको इनिङ खेलिन्।  जेस जोनासेन र राधा यादवले ३–३ विकेट लिए ।