नेपाली राष्ट्रिय क्रिकेट टिमका कप्तान रोहितकुमार पौडेलले सरकारले क्रिकेट खेलाडीहरुलाई घोषणा गरेको पुरस्कार रकम अहिलेसम्म पनि हात नपरेको बताएका छन् ।

एसियाली खेलकुदमा भाग लनि चीन जानुअघि आइतबार कामठाडौंमा बिदाइपछि पत्रकारसित कुरा गर्दै उनले भने, ‘सरकारले घोषणा गरेको रकम कति पटक भनिसकेका छौं, अहिलेसम्म आएको छैन । आउँछ भनेर आशावादी छौं । हेरौं के हुन्छ ।’

पछिल्लो ७ महिनामा अन्तर्राष्ट्रिय प्रतियोगितामा नेपालले पाएको सफलतापछि सरकारले क्रिकेट टिमका सदस्यलाई दिने घोषणा गरेको रकम थपिँदै प्रतिव्यक्ति १७ लाख पुगिसक्दा पनि खेलाडीले पाउन सकेका छैनन् ।

एसियाली खेलकुदमा पदक जित्ने लक्ष्य

एसियाली खेलकुदका लागि नेपाली क्रिकेट टोलीले राम्रो तयारी गरिरहेको भन्दै पदक जित्ने नै लक्ष्य रहेको बताए ।

उनले भने, ‘हाम्रो मेन लक्ष्य मेडल जित्नै नै हो । त्यसको लागि जस्तो टिम भए पनि, बलियो वा कमजोर जस्तो भए पनि आफ्नो प्रोसेस हामीले फलो गर्नुपर्छ ।’

१३ टिमले भाग लिने पुरुष क्रिकेट टी-२० फर्म्याटमा हुने छ । गत वर्षको अगष्टमा केन्यामा पाँच खेलको टी-२० अन्तर्राष्ट्रिय सिरिज खेलेपछि नेपालले टी-२० फर्म्याटमा खेल्न लागेको यो पहिलो प्रतियोगिता हो ।

टी-२० विश्वकप छनोटअघि एसियन गेम्समा टी-२० खेल्न पाएकाले यो निक्कै महत्वपूर्ण हुने उनले बताए । ‘वान डे गेम गत वर्षदेखि खेल्दै आएका थियौं,’ उनले भने, ‘अब टी-२० मा जानुपर्नेछ । हामी टी-२० का लागि तयार छौं ।’
नेपालले आगामी नोभेम्बरमा घरेलु मैदानमै हुने टी-२० विश्वकपको छनोट खेल खेल्नुपर्नेछ ।

टी-२० विश्वकप एसिया छनोटमा नेपाल, यूएई, ओमान, हङकङ, सिंगापुर, बहराइन, मलेसिया र छनोट हुन बाँकी अर्को एक गरी ८ राष्ट्रले प्रतिस्पर्धा गर्नेछन् । शीर्ष दुई टोली आगामी वर्ष वेष्ट इन्डिज र अमेरिकामा हुने टी-२० विश्वकपमा छनोट हुनेछन् ।

अभ्यासका क्रममा चोटग्रस्त बनेपछि ललित राजवंशी टिममा छैनन् । एक दिवसीय क्रिकेटमा राम्रो बलिङ गर्दैआएका ललितलाई एसियन गेम्समा मिस गर्ने उनले बताए ।