(वीरगञ्ज) काभ्रेको बनेपाबाट १४ बर्षीय बालकको अपहरण गर्ने व्यक्ति बुवाकै सहकर्मी रहेको तथ्य खुलेको छ । बालकका बुवा वीरगञ्ज महानगरपालिका वडा नं २५ सिर्सिया खाल्वाटोला घर भई काभ्रेको बनेपामा बस्दै आएका अम्जद मियाँ धोवीले अपहरणकारी सहकर्मी नै भएको दाबी गरेका हुन् ।

दुई वर्ष पहिलेसँगै काम गरेका पर्साकै फिरोज नाम गरेका युवकले छोराको अपहरण गरेको अम्जदले बताएका हुन् । झण्डै २० वर्षदेखि काठमाडौंमा राज मिस्त्रीको काम गर्दै आएका अम्जदले फिरोजलाई आफूले नै काम गर्न सिकाएको दाबी गरेका छन् । तर प्रहरीले यो समाचार तयार पार्दासम्म फिरोजलाई पक्राउ गरेको छैन । अम्जद र पक्राउ परेका अपहरणकारीको बयान लिन बाँकी रहेकोले यो कुरा पुष्टि भई नसकेको प्रहरी स्रोतले बताएको छ ।

बालक अपहरणमा संलग्न मध्ये एक पोखरिया नगरपालिका वडा नं ६ बस्ने जोख्खु दासको छोरा २० बर्षीय राजकुमार दासलाई प्रहरीले बिहान गोली हानेर नियन्त्रणमा लिएको थियो । फिरौती लिन आएको समयमा वीरगञ्ज–२५ सिर्सिया खाल्वाटोलामै प्रहरीले राजकुमारलाई नियन्त्रणमा लिएको हो ।

घटनाबारे जानकारी दिन जिल्ला प्रहरी कार्यालय पर्सामा बिहान राखिएको पत्रकार सम्मेलनमा डीएसपी गौतम थापाले राजकुमारलाई एक राउण्ड गोली प्रहार गरेर नियन्त्रणमा लिएको बताए ।

‘फिरौति लिन आउने क्रममा राजकुमारले बालकको बुवालाई पेस्तोल देखाइ झोला खोसेर भाग्न खोजेका थिए, नियन्त्रणमा लिन एक राउण्ड गोली चलाउनु पर्‍यो ।’ उनले भने ‘बालकको सकुशल उद्दार भएको छ ।’ दाहिने खुट्टाको घुँडा मुनिको भागमा गोली लागेका राजकुमारको नारायणी अस्पतालमा उपचार भइरहेको छ ।

प्रारम्भीक अनुसन्धानका क्रममा अपहरणमा थप दुईजनाको संलग्नता देखिएको प्रहरीको भनाइ छ । राजकुमारको साथबाट कटुवा पेस्तोल १ थान, चेम्बरमा लोड गरिएको गोली १ थान, पाइन्टको खल्तीबाट बरामद पेस्तोलमै प्रयोग हुने ४ थान गोली, ब्लुटुथ इयरफोनसहितको मोबाइल १ थान र झोला बरामद गरेको प्रहरीले जनाएको छ ।

अम्जदका छोरा गत कात्तिक १० गते पर्सास्थित घर आउने क्रममा अचानक बेपत्ता भएका थिए । बालकले नै प्रयोग गर्ने मोबाइल नम्बरबाट अपहरित बालकको बुबासँग १२ लाख रुपैयाँ फिरौती माग आएपछि अपहरणमा परेको पुष्टि भयो । फिरौती नदिए बालकको हत्या समेत गर्ने धम्की बारम्बार फोन मार्फत आइरहेको थियो । त्यसपछि अम्जद पैसा दिन राजी भएका थिए ।

बुधबार बिहान ०११५ बजेतिर बिआर २२ जे ०८०३ भारतीय नम्बरको मोटरसाइकलमा भारतबाट नेपालतर्फ अम्जदसँग फिरौती लिन आएको समयमा प्रहरीले गोली हानेर राजकुमारलाई नियन्त्रणमा लिएको थियो ।

गोली लागेर घाइते भएकाराजकुमारले नै प्रहरीलाई बालक लुकाएको ठाउँका बारेमा जानकारी दिएका थिए । भारतीय प्रहरीको सहयोगमा नेपाल प्रहरीले भारतबाट बालकको सकुशल उद्दार गरेर ल्याएको छ । प्रहरीले सुरक्षा संवेदनशीलताको कारण देखाउँदै बालकको उद्दार गरेको ठाउँको बारेमा जानकारी दिएन । जिल्ला प्रहरी कार्यालय पर्साका प्रमुख प्रहरी उपरीक्षक सोमेन्द्र सिंह राठौरले राजकुमारले दिएको जानकारीकै आधारमा बालकलाई भारतबाट उद्दार गरिएको बताए ।

‘नेपाल प्रहरी र अभिभावकलाई लिन पठाएर बालकलाई भारतीय प्रहरीको सहयोगमा उद्धार गरेर ल्याएका हौं । उताबाट अभिभावकको जिम्मा लगाएर पठाएका छन् ।’  एसपी राठौरले भने ‘ ‘कहाँ कहाँ राखियो, के के गरियो ? नेपालमै राखियो कि भारतमा ? भारतमा कतिपटक लगियो ? आदीबारे अनुसन्धान गरिरहेका छौं ।’

बालकका बुवा अम्जदका अनुसार कात्तिक ९ गते शनिबार मोटरसाइकल ग्यारेजमा काम गर्ने छोराको छुट्टी थियो । उनी आफ्नो काममा बिहान पाँच बजे नै निस्किएका थिए । छोराले खाना बनाइहाल्छ भन्ने लागेर अरु दिन खाना बनाउन भन्ने गरेको भएपनि त्यसदिन फोन नगरी बसे ।

बिहानको १० बजे खाना खाने समय मिल्छ, कोठमा पुग्दा खाना त छैन छैन, छोरा पनि छैन । फोन गरे । छोराको मोबाइल फोन स्वीच अफ छ । उनलाई यताउति घुम्न गयो होला भन्ने लाग्यो, काममा फर्किए । आइतबार घर फर्कने तयारीमा रहेका उनले पानस बसको टिकट लिइसकेको थिए ।

आइतबार साँझ बस चढ्न भनी निस्कँदै थिएँ । पौने ६ बजेतिर छोराकै मोबाइलबाट फोन आयो । ‘तेरो छोरालाई अपरहण गरेको छु,। छोरा चाहिन्छ भने १५ लाख दिनु, नत्र मारिदिन्छु ।’  उनी भन्छन् ‘गरिब मान्छे १ लाख त देखेको छैन १५ लाख कहाँबाट ल्याउने ? ’ म त्यसै बसें । अपहरणकारीको सोमबार र मंगलबार फोन आएन । बुधबार फेरि फोन आयो । ‘तेरो छोराको ज्यान प्यारो छैन कि के हो ? ’ अम्जद भन्छन् ‘मैले मसँग १५ लाख पैसा छैन भनेर जवाफ दिएपछि १५ लाख भन्दा कम हुन्न भन्दै फोन काट्यो ।’

फेरि बिहीबार फोन आयो, मैले पैसा नभएकै कुरा दोहोर्‍याएँ । उताबाट १२ लाख भन्दा १२ पैसा पनि कम हुन्न, १२ लाख नदिए तेरो छोरालाई मारिदिन्छु भन्ने धम्की आयो । त्यसपछि मैले बनेपा चौकीमा गएर निवेदन लेखाएँ, उनीहरुले अपराध अनुसन्धान महाशाखामा जान सुझाव दिएपछि मैले त्यसै गरेँ ।

प्रहरीले कहाँबाट फोन गरेको रहेछ भनेर फोन ट्रयाकिङ गर्न सुरु र्‍यो । फोन आएको ठाउँ पर्साको भिश्वा बजार देखायो । म पर्सा आएँ । उसले अर्को एक ठाउँमा बोलायो, म त्यहाँ गएर पैसाको झोला समेत राखें तर नआएपछि रिसले झोला लिएर फर्कें । सिर्सिया खाल्वाटोलामा आइपुग्दा मोटरसाइकलमा आएर उसले पछाडिबाट झोला तान्न थाल्यो । त्यही समयमा ड्याम्म गोली चलेको आवाज आयो म ढलें, त्यसपछि के भयो थाहा छैन । होस आउँदा प्रहरीले उसलाई नियन्त्रणमा लिइसकेको रहेछ । सञ्चारकर्मीसँगको कुराकानीमा उनले मोटरसाइकलमा दुईजना रहेको समेत बताएका छन् ।