रास्वपाको नयाँ विधानमा विशेष महाधिवेशनको व्यवस्था प्रस्ताव
राष्ट्रिय स्वतन्त्र पार्टी (रास्वपा) ले पहिलो महाधिवेशनबाट नयाँ विधान ल्याउने तयारी गरेको छ। प्रस्तावित विधानमा विशेष परिस्थितिमा विशेष महाधिवेशन आह्वान गर्न सकिने व्यवस्था समेटिएको छ।
पार्टी स्रोतका अनुसार नयाँ विधानको धारा ८९ मा गम्भीर राजनीतिक, वैचारिक, नीतिगत वा सांगठनिक संकट उत्पन्न भएमा विशेष राष्ट्रिय महाधिवेशन बोलाउन सकिने प्रावधान राखिएको छ। यसअघि विधानमा विशेष वा अर्ली महाधिवेशनबारे स्पष्ट व्यवस्था थिएन।
नयाँ व्यवस्थाअनुसार आवश्यक अवस्थामा बहुमत सदस्यको पहलमा विशेष महाधिवेशन आह्वान गर्न सकिनेछ। साथै, पार्टीका महत्वपूर्ण निर्णय गर्ने अन्तिम अधिकार केन्द्रीय समितिलाई रहने प्रस्ताव गरिएको छ।
पार्टी नेतृत्वका अनुसार विधानको मस्यौदा अझै परिमार्जनको क्रममा रहेकाले अन्तिम रूप भने केन्द्रीय समितिको निर्णयपछि मात्र तय हुनेछ।
