दक्षिण कोरियाका राष्ट्रपति ली जे–म्युङ ले अमेरिकी राष्ट्रपति डोनाल्ड ट्रम्प लाई उत्तर कोरियासँगको तनाव घटाउँदै कोरियाली प्रायद्वीपमा शान्ति स्थापना गर्न सक्रिय भूमिका खेल्न आग्रह गरेका छन्।

फ्रान्समा सम्पन्न जी–७ शिखर सम्मेलन का क्रममा दुई नेताबीच भएको भेटमा उत्तर कोरियासम्बन्धी विषयमा विस्तृत छलफल भएको दक्षिण कोरियाली राष्ट्रपति कार्यालयले जनाएको छ।

वार्तामा राष्ट्रपति लीले मध्यपूर्वमा तनाव कम गर्न ट्रम्पले खेलेको भूमिकाको प्रशंसा गर्दै उत्तर कोरियासँग पनि कूटनीतिक पहल अघि बढाउन आग्रह गरेका थिए। त्यसको जवाफमा ट्रम्पले समाधानका लागि प्रयास जारी राख्ने प्रतिबद्धता व्यक्त गरेका छन्।

यसैबीच अमेरिका र इरानबीचको कूटनीतिक प्रगति र सम्भावित सम्झौताका कारण अब वासिङ्टनको ध्यान उत्तर कोरियातर्फ केन्द्रित हुन सक्ने अनुमान गरिएको छ।

ट्रम्पले सन् २०१८ मा सिङ्गापुरमा उत्तर कोरियाली नेता किम जोङ उन सँग भएको ऐतिहासिक भेटको तस्बिर पुनः सार्वजनिक गरेपछि वासिङ्टन–प्योङयाङ संवाद पुनः सुरु हुन सक्ने अड्कलबाजी पनि बढेको छ।

तर विशेषज्ञहरूका अनुसार हालको अवस्थामा उत्तर कोरियाले अमेरिका–उत्तर कोरिया वार्ताप्रति खासै रणनीतिक आवश्यकता नदेखेकाले उच्च–स्तरीय शिखर वार्ता निकट भविष्यमा सम्भावना कमजोर रहेको बताइएको छ।

यता उत्तर कोरियाले रूससँग सैन्य सहकार्य बढाएको आरोप लागिरहेको छ भने चीनसँगको सम्बन्ध पनि सक्रिय देखिन्छ। प्योङयाङले भने आफ्नो आणविक कार्यक्रम त्याग्ने विषयमा कुनै संकेत नदिएको विश्लेषकहरूको भनाइ छ।