काठमाडौं — चन्द्रागिरि इन्भेष्टमेन्ट ग्रुप लिमिटेड ले सर्वसाधारणका लागि प्राथमिक शेयर (आईपीओ) निष्कासन गर्ने निर्णय गरेको छ। कम्पनीको आज सम्पन्न पहिलो साधारणसभाले उक्त प्रस्ताव पारित गरेको हो।

कम्पनीका अध्यक्ष राजन श्रेष्ठ का अनुसार अधिकृत पुँजी ५० करोड रुपैयाँ रहेको कम्पनीले चुक्ता पुँजीको चार प्रतिशतका दरले नगद लाभांश वितरण गर्ने प्रस्ताव पनि स्वीकृत गरेको छ।

साधारणसभाबाट छ जना सञ्चालक निर्विरोध चयन भएका छन्। निर्वाचित हुने सञ्चालकहरूमा राजन श्रेष्ठ, रामराजा आचार्य, प्रकाशमान श्रेष्ठ, धीरेन्द्र श्रेष्ठ, शङ्कर महर्जन र वीरेन्द्र श्रेष्ठ रहेका छन्।

साधारणसभाले अध्यक्ष श्रेष्ठद्वारा प्रस्तुत वार्षिक प्रतिवेदन र लेखापरीक्षकको प्रतिवेदनसमेत पारित गरेको छ।

होल्डिङ कम्पनीका रूपमा रहेको यस संस्थाले इन्द्रेणी मस्रुम फार्म, द निलय होटल्स लिमिटेड, काउले भाइनियार्ड एग्रो, एभरेष्ट कलर र मेरो किसानलगायत विभिन्न क्षेत्रमा लगानी गर्दै आएको अध्यक्ष श्रेष्ठले जानकारी दिए।