काठमाडौँ महानगरपालिका भित्र सञ्चालनमा रहेका सहकारी संस्थामध्ये ठूलो संख्याले नियमित रूपमा वार्षिक प्रतिवेदन नबुझाउने गरेको पाइएको छ। महानगरको सहकारी विभागका अनुसार करिब एक हजार ९०० सहकारीमध्ये मात्र ७२३ ले नियमित रूपमा प्रतिवेदन बुझाउने गरेका छन्।

सहकारी विभागका प्रमुख धुव्रकुमार काफ्ले ले पटक–पटक आग्रह गर्दा पनि धेरै सहकारीले प्रतिवेदन नबुझाएको बताए। उनले लामो समयसम्म अटेर गरे कानुनी प्रक्रिया अगाडि बढाइने चेतावनी दिएका छन्।

उनका अनुसार कतिपय सहकारी सम्पर्कमा नै नआउने, केही कारबाहीमा परेकाले निष्क्रिय हुने तथा केहीले कानुनविपरीत ऋण प्रवाह गर्ने कारणले पनि प्रतिवेदन नबुझाउने प्रवृत्ति देखिएको छ। यस्ता संस्थालाई तत्काल साधारणसभा सम्पन्न गरी लेखापरीक्षण प्रतिवेदनसहित आवश्यक कागजात बुझाउन निर्देशन दिइसकिएको छ।

महानगरले प्रतिवेदन नबुझाउने सहकारीलाई सिधै खारेज गर्नेभन्दा पहिले आवश्यक प्रक्रिया पूरा गराएर मात्र खारेजीतर्फ जाने तयारी गरेको जनाएको छ। बचतकर्ताको रकम जोखिममा नपरोस् भन्ने उद्देश्यले यस्तो नीति अपनाइएको विभागले जनाएको छ।

यसैबीच, महानगरले उच्च ब्याजको लोभमा सहकारीमा बचत गर्दा सावधानी अपनाउन सर्वसाधारणलाई आग्रह गरेको छ। सहकारीमा पैसा राख्नुअघि त्यसको कानुनी अवस्था, लेखापरीक्षण, ब्याजदर, वित्तीय पारदर्शिता र नियामक निगरानीबारे बुझ्नुपर्नेमा जोड दिइएको छ।

प्रमुख काफ्लेले चिनजान वा आफन्तको भरमा बिना मूल्याङ्कन सहकारीमा बचत गर्ने प्रवृत्ति जोखिमपूर्ण भएको भन्दै सचेत रहन आग्रह गरेका छन्। उनले यस्तो लापरबाहीले बचत डुब्ने खतरा बढ्ने बताए।