काठमाडौं । साताको पहिलो कारोबार दिन आइतबार नेपाल स्टक एक्सचेञ्ज मा शेयर बजारमा उच्च अंकको वृद्धि भएको छ। नेप्से परिसूचक आज ५४.५१ अंकले बढेर २,९३१.५५ अंकमा पुगेको छ। अघिल्लो हप्ताको बिहीबार बजार ६४ अंकले बढेको थियो।

आजको कारोबारमा कुल ६ करोड १४ लाख ७ हजार कित्ता शेयर दोस्रो बजारमा किनबेच हुँदा कुल कारोबार रकम २३ अर्ब ५९ करोड ७७ लाख रुपैयाँ पुगेको छ। गत बिहीबार ५ करोड ६९ लाख २० हजार कित्ता शेयर २१ अर्ब २२ करोड ३४ लाख रुपैयाँमा कारोबार भएको थियो।

ट्रेडिङ समूह बाहेक अन्य १२ वटा उपसूचक सकारात्मक भएका छन्। सबैभन्दा बढी वृद्धि माइक्रोफाइनान्स समूहमा देखिएको छ, जसको उपसूचक ४.२१ प्रतिशतले बढेको छ। अन्य उपसूचकहरू ३ प्रतिशतसम्म वृद्धि भएका छन्।

यस दिन रिलायन्स स्पिनिङ मिल्ससहित ६ कम्पनीका शेयर मूल्यमा सकारात्मक सर्किट लागेको छ। १८३ कम्पनीको शेयर मूल्य बढ्दा ७३ कम्पनीको मूल्य घटेको छ।

बजार विशेषज्ञहरूले यस वृद्धि पछिल्लो समय लगानीकर्ताको चासो बढ्नु र ठूला कम्पनीहरूको शेयर सकारात्मक कारोबार हुनु मुख्य कारण भएको विश्लेषण गरेका छन्।