काठमाडौं । यसपटकको नेपाल प्रिमियर लिग (एनपीएल) क्रिकेट भारतीय स्टार टेलिभिजन र नेपाली टेलिभिजन दुवैबाट प्रसारण हुने भएको छ । नेपाल क्रिकेट संघ (क्यान) का स्रोतका अनुसार भारतीय स्टार टिभीसँग खेल प्रसारणको सम्झौता हिजो मात्रै टुंगिएको हो ।

क्यानले नेपालभित्र एक्सक्लुसिभ प्रसारण अधिकारका लागि नेपाली टेलिभिजनहरूलाई टेन्डर आह्वान गरेको थियो । तर, स्टार टिभीसँगको सम्झौता भएपछि अब कुनै नेपाली टिभीले पनि एक्सक्लुसिभ अधिकार नपाउने भएका छन् ।

टेन्डर बुझाउने अन्तिम मिति आज नै रहेपनि क्यानले त्यसको एक दिन अघि नै एक्सक्लुसिभ अधिकार नहुने निर्णय गरेको हो ।

क्यानले यसपटक मोबाइल एपमार्फत पनि एनपीएलका सबै खेल हेर्न सकिने व्यवस्था गर्ने तयारी गरेको छ । ती एपमा दर्शकले पैसा तिरेर खेल हेर्नुपर्ने क्यान स्रोतले जनाएको छ ।

गत वर्ष क्यानले एनपीएलका खेल युट्युबमार्फत प्रत्यक्ष प्रशारण गरेको थियो । तर, यस वर्ष युट्युबमा खेल उपलब्ध नहुने भएको छ । टीभी पहुँच नभएका देशभित्रका दर्शक र विदेशमा रहेका नेपालीहरूले मोबाइल एपमार्फत मात्र खेल हेर्न सक्नेछन् ।

यो समाचार तयार पार्दासम्म क्यानका पदाधिकारीहरूले औपचारिक रूपमा केही बताएका छैनन् । तर, बोलपत्रदाताहरूलाई भने क्यानले इमेल पठाएर निर्णयको जानकारी गराइसकेको छ ।

क्यानका एक पदाधिकारीले अनलाइनखबरसँग भने, “प्राविधिक प्रक्रिया पूरा भएपछि मात्रै औपचारिक घोषणा गरिनेछ । प्रक्रिया पूरा हुन अझै केही घण्टा लाग्छ, आजै साँझ वा भोलि बिहानसम्म जानकारी दिइनेछ ।”

एनपीएल आगामी मंसिर १ गतेदेखि सुरु भएर मंसिर २७ गतेसम्म चल्ने तालिका तय गरिएको छ ।