विश्व च्याम्पियन अर्जेन्टिनाले फिफा विश्वकप दक्षिण अमेरिकी छनोटअन्तर्गत बुधबार बिहान भएको खेलमा पेरुलाई १-० ले पराजित गरेको छ ।

अर्जेन्टिनाको जितमा लाउतारो मार्टिनेजले गरेको गोल नै निर्णायक बनेको थियो । मार्टिनेजले खेलको ५५औं मिनेटमा लियोनल मेस्सीको एसिस्टमा गोल गर्दै टोलीलाई अग्रता दिलाएका थिए ।

यो जितसँगै अर्जेन्टिनाको १२ खेलमा २५ अंक भएको छ र दक्षिण अमेरिकी छनोटको शीर्ष स्थानमा रहेको छ । यो जितले अर्जेन्टिनाले अब कम्तिमा पनि छैटौंभन्दा माथि नै रहने निश्चित हुँदा २०२६ को फिफा विश्वकप फुटबलमा छनोट हुने पक्का भएको छ ।

त्यस्तै अर्को खेलमा ब्राजिलले उरुग्वेसँग १-१ को बराबरी खेलेको छ भने चिलीले भेनेजुएलालाई ४-२ गोलअन्तरले हराउँदा इक्वेडरले कोलम्बियालाई १-० ले हराएको छ ।

अंकतालिका उरुग्वे २० अंकसहित दोस्रो स्थानमा छ भने इक्‍वेडर र कोलम्बिया समान १९ अंकसहित क्रमशः तेस्रो र चौथो स्थानमा छन्, १८ अंक भएको ब्राजिल पाँचौं स्थानमा छ । ९ अंक मात्र भएको चिली नवौं स्थानमा तथा ७ अंक भएको पेरु पुछारमा छ ।