काठमाडौं । नेकपा एकीकृत समाजवादीको १० औं राष्ट्रिय महाधिवेशन आइतबारदेखि काठमाडौंमा शुरु हुँदैछ ।

 असार २० गतेसम्म संचालन हुने महाधिवेशनको उद्घाटन आइतबार हुने भएको हो। कमलादिस्थित नेपाल प्रज्ञा प्रतिष्ठानमा आयोजना हुने महाधिवेशनमा देशभरिबाट १ हजार ८ सय ४७ जना प्रतिनिधि आउने सुनिश्चित भइसकेको पार्टीले जनाएको छ ।

महाधिवेशन तयारीको बारेमा जानकारी दिन शनिबार राजधानीमा आयोजित पत्रकार सम्मेलनमा पार्टी अध्यक्ष माधवकुमार नेपालले महाधिवेशनमा प्रस्तुत गरिने दस्तावेज समेत तयार भइसकेको जानकारी दिनुभयो । उहाँले पार्टी विधान अनुसार केन्द्रीय कमिटी २ सय ९९ सदस्यीय, पदाधिकारी संख्या २१ जना हुने, पार्टी केन्द्रीय कमिटीले निर्णय गरी सम्मानित नेता र वरिष्ठ नेताको व्यवस्था गरिने बताउनुभएको छ ।

पार्टीको अध्यक्ष पदमा प्रतिस्पर्धा गर्न पार्टीको स्थायी कमिटीको सदस्य हुन योग्यता पुगेका व्यक्ति हुनुपर्ने, उपाध्यक्ष, उपमहासचिव र सचिव बन्न पोलिटब्युरोको सदस्य बन्न योग्यता पुगेका व्यक्ति हुनुपर्ने व्यवस्था गरिएको छ ।

पार्टीको केन्द्रीय कमिटी, केन्द्रीय अनुशासन कमिटी, केन्द्रीय लेखापरीक्षण कमिटी, केन्द्रीय निर्वाचन कमिटीको सदस्य बन्न केन्द्रीय कमिटी वा केन्द्रीय निकायको सदस्य भई काम गरेको वा पार्टीको सङ्गठित सदस्य भई करिब १० वर्ष काम गरेको वा प्रदेश कमिटीको सदस्य भई एक कार्यकाल र जिल्ला कमिटीको सदस्य भई २ कार्यकाल काम गरेका व्यक्ति केन्द्रीय सदस्य बन्न योग्य हुने जानकारी गराइएको थियो ।

महिला, दलित, सीमान्तकृत जनजाति र अपाङ्गता भएकाको हकमा भने सङ्गठित सदस्य भई सात वर्ष काम गरेको र एक कार्यकाल जिल्ला कमिटीमा रही काम गरेका व्यक्ति मात्र उम्मेदवार बन्न योग्य हुने जनाइएको छ । महाधिवेशनमा उम्मेदवार बन्नका लागि नेकपा एमालेमा नै काम गरेको अवधिलाई गणना गरिने पार्टी महासचिव घनश्याम भुसालले जानकारी दिनुभयो ।

त्यसै गरी सो पार्टीले महाधिवेशनलाई १० औँ राष्ट्रिय महाधिवेशनका रूपमा दावी गरेको छ। उहाँका अनुसार महाधिवेशनको उद्घाटन सत्रमा प्रधानमन्त्री पुष्पकमल दाहालसहित प्रमुख राजनीतिक दलका शीर्ष नेतालाई आमन्त्रण गरिएको पार्टीले जनाएको हो ।