काठमाडौं । सहकारी ठगी प्रकरणमा संसदीय छानबिन समितिको कार्यादेश (टीओआर) तयार गर्न बिहीबार दिउँसो बसेको कार्यदलको बैठक निष्कर्ष विहीन भएको छ ।

बिहीबार दिउँसो पौने ४ बजे सिंहदरबारस्थित कानून न्याय तथा संसदीय मामिला मन्त्रालयमा बसेको कार्यदलको बैठकमा प्रमुख प्रतिपक्षी नेपाली कांग्रेसले संसदीय छानबिन समितिको कार्यादेशमा उपप्रधान एवं गृहमन्त्री रवि लामिछानेको नाम राख्नैपर्ने अडान लिएको हो ।

बैठकपछि बाहिरिदै नेकपा एमालेका प्रमुख सचेत महेश बर्तौला र राष्ट्रिय स्वतन्त्र पार्टी (रास्वपा) का प्रमुख सचेतक सन्तोष परियारले गृहमन्त्री लामिछानेको नाम नराख्ने कुरामा कांग्रेस लचक भएको कुरा बताउनुभयो । उनीहरू दुवै जनाले शुक्रबार बिहान साढे ८ बजे बस्ने को कार्यदल बैठकमा कुरा टुंगिएर संसद खुल्ने दावी गरेका छन् ।

तर बैठकमा सहभागी कांग्रेसका सहमहामन्त्री जीवन परियारले सत्ता पक्षले भने जस्तो आफूहरू लचक नभएको बताउनुभएको हो । उहाँले अहिले पनि आफूहरू गृहमन्त्री लामिछाने मुछिएका ४ वटा सहकारीसहित उहाँको पनि नाम संसदीय समितिको टीओआरमा लेखेर अनुसन्धान हुनुपर्ने अडानबाट पछि नहटेको बताउनुभएको छ ।

सहकारी ठगी प्रकरणलाई लिएर सत्ता पक्ष र प्रतिपक्ष दुवै संसदीय छानबिन समिति बनाउन सहमत भए पनि कार्यक्षेत्रको बारेमा कुरा मिल्न अझै सकेको छैन । गृहमन्त्री लामिछाने पोखरा र बुटवलसहितका ठूला सहरका सहकारीको करोडौं रुपैयाँ अपचलनमा मुछिएको आरोप कांग्रेसले लगाउदै आएको छ ।

तर सत्ता पक्ष एमाले, नेकपा माओवादी केन्द्र र रास्वपा भने कांग्रेसको मागमा सहमत नहुँदा समाधान निस्किन सकेको छैन । यसअघि मंगलबार बसेको कार्यदल बैठक पनि निष्कर्ष विहीन भएको थियो ।

सत्ता पक्ष र विपक्षी दल आ-आफ्नै अडानमा रहँदा संसद बैठक पनि निरन्तर अवरुद्ध भइरहेको छ । ३ दिनपछि बसेको कार्यदलको बैठकले संसदीय समितिको टीओआरलाई अन्तिम रुप दिने प्रयास पनि असफल भएको हो ।

सहकारी ठगी प्रकरणमा समस्या समाधानका लागि संसदीय छानबिन समितिको कार्यादेश टीओआर टुंगो लगाउन कानूनमन्त्री पदम गिरीको संयोजकत्वमा ४ सदस्यीय समिति गठन भएको छ ।

जसमा कांग्रेसबाट जीवन परियार, एमालेबाट महेश बर्तौला र रास्वपाबाट शिशिर खनाल सदस्य रहेका हुन् । त्यस्तै, बैठकमा नेपाली कांग्रेसका तर्फबाट ज्ञानेन्द्रबहादुर कार्की पनि सहभागी हुँदै आउनुभएको छ ।

जसमा एमालेबाट गिरीसहित प्रमुख सचेतक महेश बर्तौला, कांग्रेसबाट सहमहामन्त्री जीवन परियार र सांसद ज्ञानेन्द्रबहादुर कार्की रास्वपाबाट प्रमुख सचेतक सन्तोष परियार सदस्य रहेका हुन् ।