काठमाडौं । प्रमुख प्रतिपक्षी दल नेपाली कांग्रेसको नाराबाजीकाबीच प्रतिनिधि सभाको आइतबार बसेको बैठकले आगामी आर्थिक वर्षको नीति तथा कार्यक्रम पारित गरेको छ ।

यसअघि यहि जेठ १ गते राष्ट्रपति रामचन्द्र पौडेलले बाचन गर्नुभएको नीति तथा कार्यक्रम कांग्रेसको नाराबाजीबीच आइतबार पारित भएको घोषणा सभामुख देवराज घिमिरेले गर्नुभएको हो । जेठ १ गते नै राष्ट्रपति पौडेलले आगामी आर्थिक वर्षको नीति तथा कार्यक्रम संघीय संसदका दुवै सदनमा बाचन गर्नुभएको थियो ।

तर सोही समयमा कांग्रेसको अवरोध र नाराबाजीका कारण संसदको राष्ट्रपति पौडेललाई धन्यवाद समेत दिएको  थिएन । यसअघि जेठ ८ गते कांग्रेसको अवरोधबीच नै धन्यवाद प्रस्ताव पारित भएको थियो । नीति तथा कार्यक्रम पनि आइतबार कांग्रेसलाई पेलेरै सरकारले पारित गरेको हो । सत्ता पक्षले आइतबार नीति तथा कार्यक्रम पारित गरेपछि अब यहि जेठ १५ गते बुधबार बजेट संसदमा ल्याउँदैछ ।

नीति तथा कार्यक्रममाथिको छलफलमा सत्ता पक्षका नेता, अर्थमन्त्री वर्षमान पुन, प्रतिपक्षी नेता प्रेम सुवाल र चित्रबहादुर केसीले मात्र भाग लिएका थिए । यद्यपि आइतबार नीति तथा कार्यक्रममाथि उठेका प्रश्नको जवाफ दिने क्रममा प्रधानमन्त्री पुष्पकमल दाहालले संसदको २ महिनादेखिको अवरोध आइतबार नै साँझ र भोलिसम्ममा अन्त्य हुने बताउनुभएको छ। तर उहाँले यस्तो कुरा भने पनि कांग्रेसको नाराबाजीबीच नीति तथा कार्यक्रम पारित भएको हो।

आइतबार आगामी वर्षको नीति तथा कार्यक्रममाथि उठेका प्रश्नको जवाफ दिंदै प्रधानमन्त्री दाहालले संसदमा रहेको अवरोधको बारेमा प्रतिपक्षी दल कांग्रेससँग निरन्तर रूपमा छलफल भइरहेकाले निष्कर्ष निस्किन लागेको बताउनुभयो । सहकारीको बचत रकम हिनामिनामा उपप्रधान एवं गृहमन्त्री रवि लामिछानेमाथि छानबिन गर्न संसदीय समिति गठन गर्नुपर्ने माग राख्दै कांग्रेसले संसदका दुवै सदनका बैठक अवरुद्ध गरिरहेको छ ।

सत्ता पक्ष कांग्रेसलाई पेलेर नै जाने नीतिमा हिंडेपछि अब बजेट पनि विरोधकाबीच संसदमा आउने अनुमान गरिएको छ ।